立場新聞 Stand News

關於 Pokemon GO 的十個噏風

2016/7/26 — 11:04

Pokemon GO 遊戲截圖

Pokemon GO 遊戲截圖

有足夠打機經驗嘅朋友都知道,不過提提比較少打機嘅朋友:

1. 打機都係想開心下,唔一定係一窩蜂港豬,打機嘅人一樣可以關心社會,用網戰最常用嘅講法係--你又知我冇上街乜乜乜?

2. 每隻game 都有生命週期,變幻原是永恆,熱潮一定會有一日退卻,只係早遲問題,唔駛因為熱潮快退卻而鬧人一窩蜂。維持玩者熱情嘅責任在開發商,唔在玩者。

廣告

3. 阿叔阿嬸都玩,代表隻遊戲入屋,長輩會打機其實係好事,至少唔會淨係睇大陸劇或者share長輩圖。作為子女,如果阿爸阿媽玩,你不妨教下佢地秘技,一齊玩都係孝順,長輩最需要嘅,其實係你嘅關心。

廣告

4. 當你見到好多人好狂熱嘅時候(尤其洗版),要明白寵物小精靈對好多二十至三十幾歲嘅人嚟講係珍貴回憶,而家有得用手機玩,佢地一定會愛不惜手。

5. 呢點係同玩緊嘅朋友講:而家呢隻Pokemon Go手機遊戲,同大家以前用Gameboy 或者 NDS 玩嘅唔同,佢係免費下載嘅。佢要賺錢,就要研究點樣令你上癮(好聽叫欲罷不能)同埋課金,玩game同去做gym 一樣,要知道自己可以去到邊個位,時間同課金都係,你俾幾萬蚊上課程唔係問題,但唔好好似啲人俾幾十萬拉筋。

6. 其實任天堂出隻game 可以令到全世界咁多人三五成群企響條街度玩,驚嘆蔚為奇觀之餘,都值得諗下點解,呢個唔只係打機課題,而且係社會學、市場學、心理學,甚至係政治課題。呢啲留俾各方專家寫,小弟會留名追睇。

7. 超級老套都要講一句,玩嘅時候真係要睇路,唔好死。

8. 第一日玩嘅時候,去到啲有人聚集捉精靈嘅地方,啲人真係會相視而笑,呢種對住陌生人嘅時候,你知我知你做緊乜,我又知我知你做緊乜嘅樂趣,其實好有趣,甚至啲男男女女會搭訕(個人經驗),宅宅們,機會來了。

9. 關於私隱問題,其實同所有apps嘅條款一樣,大家都唔會點理就會同意。其實大部分要用你GPS 嘅app 一樣,佢記錄你行縱就梗架喇。你嘅資料其實就益咗Google同任天堂,不過如果係中國手機就可能唔同。

最後一點,同打機多少無關。

10. 至於個譯名問題,叫精靈寶可夢定寵物小精靈,比卡超定皮卡丘,如果係由細睇到大嘅朋友,可能會好在意,如果真係好在意,咪唔好玩囉,但唔駛鬧啲玩嘅人嘅。況且,而家只有英文版,冇譯名問題添。(我都係覺得港版嘅名順耳好多)

 

作者 facebook

發表意見