立場新聞 Stand News

【雞全部都無雞】KFC 出日式火鍋 賣牛賣蝦唔賣雞

2016/8/29 — 17:33

KFC 久唔久就會推出新食品。繼早前推出日式牛肉飯,觸發網民熱烈辯論到底有無伏之後,9 月 1 日山德士上校再下一城,將推出兩款日式火鍋。不過離奇的是,這兩個鍋都無雞。

兩款日式火鍋分別是「關西風味牛肉鍋」及「和風海鮮湯鍋」,只限灣仔 298 電腦特區分店發售。U Magazine 報道,兩個鍋的湯底均係用日本名牌「大多福」的醬汁調配。牛肉鍋有牛肉、豆腐和蔬菜做料;海鮮鍋就係落青口同大蝦等。除此以外,食客也可以選擇追加配料,如芝士雞尾腸、芝士竹輪卷、厚切蕃茄、魚豆腐之類。

老老實實,呢個鍋好難唔令人聯想到吉野家。吉野家好幾年前已經推出火鍋,仲頗受好評,甚至受歡迎過牛肉飯。今年年初有吉野家分店搞期間限定火鍋放題,就一度吸引食客冒雨排隊個半鐘,成為網上熱話。這幾年,吉記甚麼味道火鍋都出過,比如早排就有過芝士雞煲。雖然食到終盤芝士黐底比較麻煩,不過好歹都叫做有雞,偏偏 KFC 出火鍋又唔出雞,真係令食客想同佢講句「毋忘初衷」。你叫 KFC 雞粉情何以堪,唔通將隻雞塞落個鍋度咩!

廣告

套產配珍珠飯加汽水,每份 $49.9。想試味的讀者,可以在 9 月 1 日晚上 6 點 order 返個。

廣告

發表意見