立場新聞 Stand News

食花生無罪,仲有理㖭。

2017/2/25 — 16:46

(花生友特約轉載)

花生友是貶詞。「你班友喺度食花生!」單睇字面都好似識得發聲一樣,隻!隻!字!都!無!盡!怨!恨!

但各位,我是準備在此歌頌花生友的偉大。請準備花生(拿出來,開蓋,倒落口)。

廣告

識食花生都要識揀場景食,才會食得別具滋味。

舉個例,舉例啫,無影射 — 行街見到兩個女人鬧交,有個一頭鬈毛覺得自己件衫同高踭鞋襯得好有品味的,指住另一個一副苦情奶媽模樣的:「你諗嘅嘢我十幾年前都已經係咁諗啦!有咩咁巴閉?」此時此刻如果開包花生,神奇的事發生!花生會有陣葡萄酸!好酸!

廣告

我又舉個例,真的,只是例子 — 情人節行入餐廳,苦情奶媽個老公朗讀寫給老婆的演講辭式情書,又講公司政策又講飛黃騰達,隔籬枱鬍鬚佬爽脆講句:「我哋 #今日只談一生一世」此時此刻如果開包花生,神奇的事又會發生!花生會脆過薯片!即使你明知鬍鬚佬也只是朗讀別人寫下的 #Hashtag 。

如果你見到法官大人如何指點苦情奶媽,口入面的花生甚至會無熱氣,只得正氣 — 好啦舉完了。識食,就知道有些花生情景有今生無來世,要好好把握。

問題回到基本 — 有幾偉大呀花生友?都不過圍在台邊吱吱噚噚咦咦哦哦。你睇曹星如打拳都不過是得個睇字啫,更何況如果比賽內定要曹星如輸,我們還有歡呼叫囂的需要嗎?如果我們知道真正笑到最後、踩過所有酸味乾脆正氣直奔終點然後任由 facebook 專頁荒廢的,會是暗地裏笑騎騎的苦情奶媽,還要食花生嗎?

食花生的偉大就在於,口食花生,眼仍然望住事情發生。食花生是任何改革的必經之路。食花生是群眾的力量。

如果好似所謂遍地黃金時代,個個唔食花生,專食魚翅麻醉,對身邊事情睇都費事睇,才最慘。曹星如打拳?Who Cares?更不會理擂台是否完整裁判是否公平冠軍是否內定。

我買包花生咬咬咬,睇波又好睇女又好睇人選舉都好,至少我有像個紳士蹺起雙手擘大眼「睇」,有熱鬧好湊,於是議題才會一直被炒熱,才會發酵。這是一個太多議題太少時間的時代,多一個花生友,其實也是多一對眼。

當然一定有些人指責食花生是圍爐取暖不負責任,得個睇字,甚至,唔夠勇武。Sorry,肯睇,肯恥笑,肯起哄,其實都好花精神㗎。而你也難保有一日,任何一個花生友拋低個樽落場參賽。

食花生嘅嘢,最重要是買兩罌。一罌用來監察過程時解口癮,思考如何令到我們不是只得食花生嘅份。

另一罌,當然是留待我們可以影響賽果時慶祝。

P.S. 密切留意各大百佳及惠康超級市場,優惠期3月3日至3月9日

P.P.S. 想食住花生睇好戲?click佢慢慢enjoy~ https://goo.gl/Iu24gW

發表意見