立場新聞 Stand News

點解唔試下威士忌?

2016/8/9 — 16:54

資料圖片

資料圖片

【文:Aslan Cheng】

好多人覺得飲威士忌係成熟、上左年紀既人才有的習慣,又抱住烈酒一定難入口既刻板印象,呢個誤解同埋對威士忌認識不足,正正係好多人唔踏出第一步去飲威士忌既原因。

其實威士忌好平易近人,要平有平,而且變化多端,想飲淡口小小可以加水加冰飲,沖做Highball黎飲(即係溝梳打水)更係消暑一流。你肯飲既啤酒、紅酒,點解唔試下威士忌?

廣告

未飲過威士忌既人最Care既都係自己個荷包,以為威士忌一定售價不菲。其實威士忌門檻唔係大家諗得咁高,想飲好簡單,落Whisky Bar 可以一百蚊都唔洗就埋到單,自己買既平平地百幾二白港紙都已經可以好好享受。

一支酒通常700ml,每次飲35ml都飲到成20杯,開完仲可以放好耐,唔似紅酒開完好快變質。屋企附近有辦館既,你實搵到Highland Queen, Chivas, Johnnie Walkers其中一隻,是但一款都抵玩,想有保證既可以去大型超市、7仔買。

廣告

落Whisky Bar就去番「Ginger」,有年份既酒都只係七十蚊杯,價錢真心親民。

一開始入門唔洗講究太多,去朋友到試又好,落Bar到飲又好,隨便搵隻杯細細啖飲落口試下佢咩味先,試過原汁原味之後就試下加其他野,慢慢去飲下個變化。
之後你就會發現威士忌係好鬼馬,一時係適合自己靜靜地飲既濃濃烈酒,加冰後成為和友人舉杯談心既杯中物,溝梳打水後搖身一變上得飯枱。唔講唔得既當然係加汽水綠茶,雖然係破壞左威士忌既風味,但作為認識威士忌既第一步都不算為過。

舌頭感覺到既味道只係享受威士忌既一部分,如果你miss左一支好酒既香氣,尾韻,同支酒背後既故事所帶比你既享受,絕對會令其他威士忌愛好者痛心疾首,為你感到可惜。

所以係你用舌頭淺嘗過威士忌後,就可以開始涉獵佢其他獨特既地方。威士忌出產過程由水源、穀物、烘乾,到蒸餾、陳年間有數不盡的變化,自然天氣都係因素之一,就此孕育出豐富多彩的味道,而背後既故事亦係威士忌引人入勝之處。

如果你有興趣知道威士忌為什麼有這種味道,用什麼飲法和杯才是最好、如何不破壞它的風味,就可以你的開始入門之路了。

 

作者簡介:支持一下我的寫作,入黎比個LIKE
 

發表意見