立場新聞 Stand News

80分鐘好戲:殺人犯

2017/10/3 — 17:10

《80分鐘好戲:殺人犯》

年份:2009年
導演: 周顯揚
編劇: 杜致朗
主演: 郭富城 / 張鈞甯 / 張兆輝 / 何超儀 / 錢嘉樂

官方劇情:半島大廈天井,警員徐泰被發現時身負重傷,奄奄一息。同時,警方還在現場找到了昏迷不醒的督察淩光(郭富城飾)。結合近期發生的電鑽殺人案,警方懷疑此案為同一兇手所為。淩光蘇醒後失憶,導致其無法解釋與徐泰相會之事,因此陳安哲(錢嘉樂飾)等警員指責其為兇手。余總警司(董勇飾)讓他不要插手此案。

廣告

淩光深感委屈,身邊只剩好友阿鬼(張兆輝飾)力挺。記事簿顯示,淩光在案發時均在請假,他詢問妻子希愛(張鈞甯飾)和養子仔仔(譚真一飾)希望喚起當時的記憶,無濟於事。他的腦中不停閃現血腥場面,精神極度失控,不但冷淡妻兒,而且忽視了剛離婚的妹妹淩敏(何超儀飾)。

收集證據時,淩光赫然發現,幾名死者竟然跟自己有著特殊的關係,而且這背後還隱藏著更大的陰謀……

廣告

──────────────────

憑我睇戲(尤其爛片)嘅閱歷,我大膽咁講:整體嚟講,《殺人犯》並非一套頂級爛片。

《殺人犯》嘅故事、主旨、配樂、劇情,頭80分鐘全部都係水準之上,郭富城及其他演員演出賣力,唯一要挑剔嘅係佢個仔扮細路扮得好差(可能因為劇情需要)。

《殺人犯》為人詬病嘅係結局……偏偏結局有成40分鐘……

根據官方劇情簡介,《殺人犯》係套緝兇懸疑片。而呢類戲會有以下最大公因數:幾個疑兇,一堆謎團,好多線索;劇情就係主角抽絲剝繭,層層推理,故弄玄虛,配角領便當嘅領便當、線索斷得嘅就斷,大家恰於其份,到最後完場前十至十五分鐘解開所有謎團兼搵到主謀,兇手講一大論解釋原因之後自殺身亡,大團圓BBQ結局,正義得到彰顯。日漫《少年金田一殺人事件》就係好典型嘅例子,每個故事都係咁上下。

以呢個公式去量度,《殺人犯》係套幾另類嘅懸疑、緝兇片。特別之處有兩個:

(1) 兇手自爆:戲中幕後主謀,即係郭富城個仔,喺套戲一半多些少(約80分鐘),大模廝樣坐喺郭富城前面,無撚端端自爆自己係主謀。

呢個時候距離完場仲有40分鐘!更重要係,佢個仔完全係屎忽痕自爆,無人迫佢、唔係佢講漏口,而係特登喺嗰個moment自爆自己係殺人犯!我屌!!!!!郭富城根本無做任何似樣嘅推理去作出合理嘅懷疑,只係隨口問下個仔,點知佢即刻自爆!!天呀!!兒嬉到極點。

劇情毫不嚴謹,冇佈局,零伏線,當大家估緊佢個仔係咪兇手嗰陣,佢個仔就跳出嚟自首!劇情片無揭秘,解謎靠兇手自爆,認真另類。

因為一早講咗個兇手係邊個,淨返落嚟嘅40分鐘,全部集中講郭富城如何報復。兇手係一個身高三呎嘅細路,你用大半套戲去講點樣嘗試彰顯公義,仲要失敗嗰隻,牽強,毫不合理。

──────────────────
文章硬插廣告時段
不要問,只要like,仆街史兄的專頁同IG。
Facebook : https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/
Project HK 專頁:https://www.facebook.com/PROJ.HK/
─────────────────────

(2) 悲劇收場:《殺人犯》結局係冚家剷嘅受害人郭富城反而被屈殺人兼患上精神病,而真兇手仔仔就逍遙法外。呢個已經好另類。

更另類係郭富城作為一個受害人,你 • 一 • 啲 • 都 • 唔 • 會 • 可 • 憐 • 佢!點解?因為郭富城係戲中嘅演出非常乞鳩人憎,角色腦殘低能,後半部表情演技誇張無倫,作為觀眾嘅我覺得佢畀人陷害係罪有應得……咁講真係好涼薄,但當中有三場戲值得一提:

1. 岸邊錯手殺死張兆輝:張兆輝係劇中少數有正常智商同腦袋嘅好人,一路企喺郭富城嗰邊,諗住幫佢。點知郭富城因為啲誤會,錯手推咗佢落石涯……張兆輝死咗,然後郭富城喺60秒內大叫咗九句「唔係呀!」同三句「冇呀!」(我逐句數住,真係足足夾埋十二句),鏡頭仲要zoom近佢個大頭。仆街,你真係好撚煩,好討厭呀!唔係你老母呀!!冇你老味呀!!

寫劇本嘅居然可以寫主角殺死一個忠嘅配角,真係大整蠱,人格大謀殺。

2. 拖個仔去浮台:全劇最痴撚線嘅一幕。郭富城想報仇,拖咗佢個仔游出去浮台,抱住佢游下游(多麼浪費氣力呢……),上到浮台諗住講數,如果個仔唔應承就浸死佢。點知!佢個仔原來識游水,哈哈哈哈哈;佢個仔仲要串鳩佢:

仔:「我唔會以為帶我出嚟呢個爛鬼浮台,我就會驚呀嘛?」

郭:「咁你頭先做乜扮驚?」

仔:「我唔扮驚你又點會帶我出浮台?」

嘩哈哈哈哈哈哈哈,真係好歡樂。我自問寫唔出咁具歡樂嘅對白。

以上算小腦殘。大腦殘係喺郭富城游出浮台之時,佢個仔嘅partner已經喺岸上殺咗郭富城老婆。故事重組一次,即係因為郭富城諗住靠嚇講數(仲要失敗),無喺屋企陪住老婆,搞到老婆畀人殺咗。殺個細佬殺唔到,自己腦殘間接害死自己老婆,郭富城嘅討厭指數再隨外圍股市造好而急升,升穿一百天移動平均線。

3. 化粧、演技誇張:郭富城返到屋企,發覺老婆畀人分咗屍。之後嗰十分鐘完全陷入歇斯底里嘅狀況。郭表達嘅唔係傷心,係痴線;你感到嘅唔係同情、傷心,而係:

仆你個街,你好煩呀!你比個真正嘅兇手更加討厭!

去到佢拎電鑽殺人,殺咗個流浪嘅,個樣已經好煩膠(文章配圖);點知個細佬殺極都殺唔到,只係喺度大叫人渣,我好多次想熄機唔再睇落去……佢嗰種煩同討厭透過個芒滲咗出嚟。

最尾猶太人嚟到搵槍指住佢,郭富城一係投降報唔到仇、一係嘗試殺死佢個仔。去到呢個咁關鍵嘅位,佢仍然貫徹腦殘:佢執意決心報仇,但又唔抱佢個仔一齊跳落崖嚟個同歸於盡(都算合理結局,兩個殺人犯都死),而係選擇舉高手慢動作咁用電鑽鑽落個仔度(佢以為電鑽裝咗核彈頭,鑽一下就死?)……結果猶太人開槍射中佢,仇又報唔到,自己又要坐監。

樂觀啲諗,郭富城徹底演活咗一般猶太人嘅弱能,只係識欺善怕惡,根本無推理能力同智商去破案,要靠兇手自爆。

結論:導演同編劇根本超憎郭富城。居然可以拍到一個受害人咁乞人憎,我懷疑佢哋係熊黛林、Amanda S同其他前女友夾錢請返嚟,用呢套戲做鳩郭富城。

─────────────────────

【谷亞莫mode on】呢個故事教訓我哋,領養孩子之前,一定要去驗下自己嘅智商,以免遇到奸人,即使人哋話畀你知佢係奸嘅,都一樣陷害到你,唔單止保唔住老婆,連自己都變埋有精神病。科科!【谷亞莫mode off】

─────────────────────

養份時間:如何翻拍《殺人犯》

成套《殺人犯》最戇鳩就係郭富城失憶同埋佢身高三呎嘅仔係兇手。佢畀人餵藥餵到失憶,但又記得遠古嘅嘢,極大矛盾。

郭富城兒時被父母遺棄,心理不平衡,漸發展出雙重性格;長大後當上猶太人,為救助棄嬰而收養一子。

後嚟喺處理一單棄嬰案嗰陣,兒時陰影加上工作不如意,加上案件同自己兒時情況非常相似(呢個要再度),喺心底日積月累嘅情緒終於爆發。

短時間內屋企人同朋友逐一被殺,郭富城以為個仔係老人精、處心積累殺人,其實係佢將自己嘅主觀感受投射咗喺個仔度。

最後發現原來自己先係殺人兇手,一切真相大白,大團圓結局……

你問點解咁短同埋咁似上次《見習黑玫瑰》嘅翻拍橋段 https://goo.gl/FxTfvk……一個得三呎嘅細佬殺人,咁嘅劇情點改寫?仲有呀,同一個人寫嘢,咪又係來來去去嗰兩三招……

──────────────────
【港產爛片系列】

-《畫蛇添足:兇手還未睡》 https://goo.gl/ySBCih
-《穿屎主演,必屬爛片:見習黑玫瑰》 https://goo.gl/FxTfvk
-《神龍賭聖之旗開得勝》 https://goo.gl/qOj5UK
-《內衣少女》 https://goo.gl/3FNXgN
-《阿嫂》 https://goo.gl/cI7kHo
-《我阿媽發仔瘟》 https://goo.gl/JG2i49
-《王老吉、OSIM特約:女人本色》 https://goo.gl/DnbXJA
-《遠離寒戰,冚家保平安》 https://goo.gl/MT5RSE
-[非爛片]《導火新聞線電影版之深宵問答》 https://goo.gl/WwQYfU

──────────────────
文章硬插廣告時段
不要問,只要like,仆街史兄的專頁同IG。
Facebook : https://www.facebook.com/Relgitsjg
IG (主要用嚟睇女仔) : https://www.instagram.com/iamuncleshit/
Project HK 專頁:https://www.facebook.com/PROJ.HK/

發表意見