朝雲

朝雲

左膠

2019/2/19 - 18:00

A0 訪問系列(一)可憐人自有可恨處,沒有毒毒係無辜嘅

Jason(朝雲 攝)

Jason(朝雲 攝)

弁言

筆者終於的起心肝,花幾百蚊買下漢娜.鄂蘭最優秀的傳記《愛這個世界:漢娜鄂蘭傳》。

厚逾八百頁的巨著到手,筆者迫不及待翻啊翻,務求先看「學術八卦」。

廣告

列奧.史特勞斯(Leo Strauss)與鄂蘭同是德國出生的猶太人,同樣去德赴美,但兩人一生幾乎毫無交集。

傳記披露其實是有的。1930 年代,史特勞斯在普魯士國立圖書館偶遇鄂蘭,從此拜倒裙下。

讀者很易在網上看到鄂蘭的豆蔻年華,是智慧和美麗完美交融,恍若天使迷路誤闖人間。她的一生與歷史互證,堪似驚濤拍岸,在紅塵勾起卷卷雪花。

但史特勞斯無緣進入她的生命。鄂蘭嫌他太保守,斷然開除他的兵籍。史特勞斯悻然而退。縱然日後同在芝加哥大學任教,但兩人老死不相往來。

鄂蘭曾寫信給老師雅斯培(Karl Jaspers),私下提過史特勞斯:

「他具有真正的智慧。我。不。喜。歡。他。他應該有五十多歲了。」

「慘慘豬……」從此筆者看史特勞斯著作,每遇不明處,都充滿無限同情。興許因所有腦筋都埋首書本,導致腦部失調,得到智慧卻喪失追女仔的能力。字字血淚,青史班班,筆者不禁掩卷長嘆。

究竟毒毒該如何突破「史特勞斯陷阱」此一歷史循環?筆者訪問了三位 A0,盼為所有同襟帶來啟發。

✽ ✽ ✽

問:你今年幾多歲?

Jason:30 歲。我唔係食齋,我鍾意女仔,但一直冇拍過拖。

✽ ✽ ✽

問:由細到大你暗戀過單戀過追求過幾多個潛在對象?

Jason:小學嗰啲講笑咁講,唔係好重要。之後嘅我真係要數,你等我一陣……

原來有 11 個。

問:嘩、嘩、嘩!

Jason:其實唔算多。17、18 年嚟除勻咁計,即係一兩年先有一個潛在對象。你覺得多定少?

問:多呀~

✽ ✽ ✽

問:11 個人之中,有幾多人你追求過;有幾多人你表白過?

Jason:大約有 8 位我採取過主動。

至於表白……我唔直接講。我講對方拒絕嘅次數,即係佢知我想點樣。我正式收過三次回絕。

因為有兩種情況。一種係回應表白嘅正式回絕;另一種係你感覺到雙方關係出問題。因為對方知道你有意思,開始避你,你唔駛表白都識得放棄。

✽ ✽ ✽

問:你唔似坊間對「毒毒」嘅標籤,匿埋一角粒聲唔出,其實都幾主動。

Jason:我以前係咁㗎!但而家人大咗,識得要主動啲。二來出嚟行,唔好俾人太容易睇出你內向。我的確內向,但外人未必知。

✽ ✽ ✽

問:有冇諗過點解冇一次開花結果?係土地問題抑或其他?

我知道男仔分兩類,一種係見到啱心水就會去追;另一種係見到心上人就會考慮一生一世,諗到結婚同責任,因為持重而磋跎,錯失機會。你屬於邊類?

Jason:我的確會考慮好多嘢,諗得最多嘅就係相唔相處得埋,又會諗雙方性格夾唔夾,遇到分歧會唔會有拗撬。

最重要係拍拖一定有開心有唔開心,後者好影響自己同對方,甚至對世事嘅睇法。如果拍拖花咗好多時間喺磨合同爭吵,到頭來都要分開,係咪浪費對方同自己時間?

我未諗到結婚生仔,就已經諗好多嘢。我好驚嘥對方時間。

我諗我天生性格係咁,我唔信拍戲嗰種浪漫,我相信愛會轉化成細水長流。希望長遠證明彼此契合,雙方嘅經歷都冇白費。

✽ ✽ ✽

問:有冇人依然放喺心上,仲耿耿於懷?

Jason:近啲嘅人感受當然會重啲。過去有一位對象嘅處理手法,的確曾令我比較唔開心。但我盡力同所有人保持朋友關係。

11 個人之中,有一位識咗好耐,曾幾何時大家都 feel 到想行前一步,佢行得比我更前,反而係我短路。我自覺縮得好難睇,令到對方尷尬。好多謝佢嘅大量,我哋繼續做朋友到而家。

我從來冇諗過番撻。當我追緊一個人,過去嘅人我都會放低。如果而家我有一個心上人,呢個人當然最緊要。

問:嗯嗯我好明白。

✽ ✽ ✽

問:過去嘅失敗令你有咩改變?

Jason:每一次經驗都學到啲嘢。我由好被動變到主動啲,要用好長嘅時間慢慢轉化。

朋友曾經問過我,邊一個傷得我重啲。我有諗過,但唔一定係對方傷我,而係我自己無可以避免感到痛苦。

任何傷害都抵銷唔到我愛一個人嘅滿足感。我好感恩我冇放棄,要多謝佢哋每一個人。

感情路上一定有波折,有啲原因在於自己;有啲原因在於命運,唔完全係自己問題,我冇遺憾。

✽ ✽ ✽

問:最後一條問題。咳咳,我邱比特上身,有冇說話想借訪問去講?

Jason:我會再勇敢一啲爭取,用自己認為啱嘅方法;用對方接受到嘅方法去追。唔會為咗就人而放棄;亦唔會唔顧對方感受。

參考文獻:
Carole Widmaier《政治哲學終結了嗎》
孫傳釗〈列奧.施特勞斯與漢娜.阿倫特〉
伊莉莎白.揚.布魯爾《愛這個世界:漢娜鄂蘭傳》

 

(編按:A0 為大學生術語,A = available,0 = 拍拖次數,A0 即從未拍拖的意思。)

作者 Facebook