立場新聞 Stand News

Kate Winslet 奪金球女配,實至名歸助《教主》上位

2016/1/11 — 18:12

Michael Fassbender 在《時代教主:喬布斯》(Steve Jobs)中飾演 Steve Jobs。

Michael Fassbender 在《時代教主:喬布斯》(Steve Jobs)中飾演 Steve Jobs。

睇完《時代教主:喬布斯》(Steve Jobs),可以「享受」Danny Boyle 的影像風格,雖然係人物傳記片,跟攝影師配合下,鏡頭人物仍然非常有動感,令到以對話場口為主的充滿活力。

倘若我屈機Danny Boyle 係武生,負責編劇本的Aaron Sorkin 就係文生,呢位係《社交網絡》已經示範左長對白但唔悶且有深度的高難度動作,今次功架依然,夾以鏡頭,簡直劇力、節奏叫觀眾透不過氣,睇慣網片,成日fast forward 之輩,相信也會因兩位實力之大成,持久力加倍,一文一武,可謂摩訶無量!



後台設定好得!

廣告

今次有別上齣喬布斯傳記電影,並非順序帶出他的人生不同階段,全程竟以幾場蘋果產品發佈會為骨幹,集中講後台喬布斯同幾位核心團隊的對話,場面設計其實象徵意味昭然若揭,大家認識的喬布斯係前台強勁銷售完美示範,掌聲背後又是何許人,後台就是一個讓人睇真啲的地方,要實踐呢種設計好大挑戰。

因唔係靠行為、事件去突出人物性格,而係透過一場有衝突味道的對話,去帶出角色的過去和價值觀,亦同時衝擊演員們能耐,可以藉著一字一句慢慢舖陳角色層層的心理變化。

廣告

當大家集中在飾演喬布斯的Michael Fassbender身上,我覺得最令人眼前一亮就係影后級的Kate Winslet(憑片獲得本屆金球獎戲劇類最佳女配角)。

Kate 簡直係葉問咁抽得

Kate 飾演喬布斯助手Joanna Hoffman,外型有點大媽feel,幾乎都認佢唔出,但佢嘅力場實在沒法擋,明明冇搶戲但偏偏眼睛卻又不其然停留在她的個人表演上。

Michael 無疑都係好好戲,但擺埋一切長期處於半捱打狀態,直到接近埋尾一幕,佢積累長期嘅原力瞬間爆放,喬布斯亦順勢進入全捱打狀態,讓Kate 便了幾分鐘的電影當家,亦將喬布斯從高高在上的神級,打回人型,都係一個有情感需要,不能亦不想寂寞的凡人。

呢個approach其實大家都會估到,唔係喬布斯就會太離地,唔得立體,但值得欣賞係個編+導的手法,親情、骨肉就係咁特別、微妙,可以叫人快樂,叫人痛死,默默舖住條父女線,瞬間成為亮點,仔女都係自己的倒映,要翻生,其實解藥就係附近。

教主留低係世界,除左智慧型電話外,真係仲留低左唔少儆世人生道理,行唔行得出就睇下你遇唔遇到Joanna,齣戲勁在唔係講道理,但道理不覺入哂。
 

發表意見