立場新聞 Stand News

Nomo 營銷

2016/10/8 — 10:38

教大家一個字:Nomophobia。

中文可以譯做,無手機恐懼症。

個字好易記,拆開個字嚟睇:No-Mo(bile) - Phobia。仲記唔到?試吓咁記:

廣告

無咗個手機,你會驚到 No Mo 都唔認得。

無咗部手機跟身有幾緊要?美國唔同機構就此作過各類有趣調查研究:

廣告

* 四成嘅 00 後,寧願唔見部車,都唔想唔見咗部手機
* 四分一受訪者,寧願一個月冇得啪啪啪,都唔可以冇咗個電話
* 有人話願意為手機放棄手指尾、或割咗個腎。理由係:佢用手機,多過佢用手指尾(同個腎)。

大眾機不離手,對人際社交產生咗直接影響。

美國餐廳 Sneaky’s Chicken,就借此作推廣命題,鼓勵客人用膳期間專注同朋友交流,玩少陣手機。餐廳提出只要你肯將部手機交比侍應放入箱保管,嗰餐飯埋單就有九折。呢個做法相當受歡迎,幾乎所有客人都肯接受呢個條件。(但我唔排除有人拎屋企嗰部封哂塵嘅 Nokia 8210 交俾侍應,然後食飯時繼續玩 iPhone 7 Jet Black)

玩手機除咗危及社交,更會危及生命。揸車玩手機,分分鐘死人。

有鑑於日本因行車玩手機導致嘅交通意外頻生,當地三大企業 Toyota Motor、Komeda 及 KDDI,㩦手研發出一個嶄新嘅手機程式-Driving Barista,奬勵喺駕駛時唔用手提電話嘅乖乖司機。

程式巧妙應用咗智能手機內嘅陀螺儀傳感器(Gyro Sensor),當你行車期間手機保持扲低嘅狀態,能夠堅持 100 公里唔用個手機,程式就會奬你一張咖啡券,每忍耐多 100 公里,就有多一張贈劵。但若果你中途忍唔住聽左個電話,或走去捉隻 Pokemon,咁個記錄就會 Reset 返零從頭計過。呢個玩法有啲似 Pokemon Go 孵蛋嘅原理,不過變成孵張咖啡 Coupon 出嚟。

一個手機上嘅程式,設計出嚟就係為咗叫你唔好玩手機。

若果唔係背後有減少交通意外嘅良好設計理念,驟耳聽落都幾有聞西 Feel。(唔係文西。文西係 Da Vinci,聞西係羅家英)

原刊作者facebook專頁

發表意見