立場新聞 Stand News

Page One 係衰精品,唔係衰書

2016/11/18 — 15:47

硬係覺得 Page One 近年係衰精品而唔係衰書。

當年佢執左銅纙灣店,喺海港城谷開兩層旗艦,又 cafe 又生活精品加書,都係諗住落重藥盡地一煲。成層有一半唔係書,有書係同精品夾住賣,家居佈置書隔籬放家居用品,廚具旁邊有食譜,有啲似而家 MUJI。

初開嗰陣,一行入店就係小說,仲有少少詩集,設計書當然有一個分區但已經唔係重點。去到呢個年代,係人都知大書店係靠買精品同嘢飲嘢食維生,但係好景不常,一年後就開咗尖沙咀誠品,比佢搶哂客。人賣精品佢賣精品,點解 Page One 會輸呢?

廣告

有人話佢啲精品唔夠特別,都係既,似係 Zara Home + Homeless 啲貨,有少少 gimmick 但又唔夠靚。但我覺得最大死因係誠品係用商場分租形式去賣精品,每一格都畀盡個品牌有自己嘅空間佈置,所以顧客轉個身就覺得有新鮮感。而誠品亦唔使自己逐樣入貨,佢只要入個品牌就可以,大量減省人手。而明顯佢同品牌之間個合約短,尖沙咀店啲獨立品牌耐唔時就轉,基本上冇生意就好快要走,一來書店唔會蝕,二來又係保鮮,keep 住入新嘢。Page One 入精品,入來入去幾條線,就出事了。地點都有少少關係,我就覺得誠品近碼頭就腳啲。

早兩個月在尖沙咀亂行,行完誠品再行 Page One,前者人頭湧湧後者門可羅雀,啲書散發出喺倉底搬返出來嘅霉味,我好不容易先揀到 Asia One 出版既李志超攝影集來買,冇折扣又唔係呢度先有,但我都係買咗。見到店員,心諗佢都做唔到好耐,係有啲悲哀。

廣告

我唔係 design 人但都會懷念 Page One,因為近兩年書展都喺 Page One 平執到好精彩既關於書嘅書,一本講美國一家由紙做起既 Art Book 出版社,另一叫 The Thing The Book: A Monument to the Book as Object,邀請一幫文人藝術家,就書入面不同部件例如前言,目錄呀咁,由頭落尾玩一次,大問何謂書本。

另外,佢係咁出自家設計書,唔知係咪另一個紮死自己個倉,加速滅亡嘅原因。書賣唔出唔敢多入新貨,新貨入得少成本自然高,咁就 loop 死左。

發表意見