立場新聞 Stand News

一名助理消防區長:警隊再咁落去只會更加萬劫不復

2019/7/30 — 18:20

【文:一名助理消防區長】

我呢對膊頭又殘又舊,睇落唔係咁 sharp 醒,我一直覺得膊頭有三粒花唔係乜嘢咁威猛既事,反而成日都提醒我公僕有幾大責任。

各位警察朋友,望住自己套制服,諗下邊個出糧比我哋,當咁多巿民唔滿意嘅時候,大家係咪可以考慮下自己係咪有不足嘅地方呢,係咪可以虛心啲接受下其他人嘅意見呢。(如果你肯放低成見,上網睇下所謂黃屍所講嘅嘢,又或者好似林行止呢啲咁有公信力的傳媒人寫嘅嘢,你對成件事可能會有唔同既睇法。)

廣告

最近好多網民成日話應該加消防救護人工,坦白講,加人工邊個唔想,但呢刻唔係講呢啲嘢嘅時候,希望大家唔好喺呢時候講呢個問題了。我真心覺得警察要面對同處理嘅工作比我哋複雜好多,比我哋高人工係無可厚非。如果唔加人工,甚至減人工可以讓香港社會平靜下來,我個人好願意。

不論作為示威者或消防人員,我都好希望能與警察以互相體諒嘅心情去合作,03 年前嘅遊行,示威者係會為警察送水嘅,你們還記得嗎?多年嚟喺你哋當中散播仇恨,將你哋推向同示威者完全對立嘅到底係邊個呢?表面上講要政治中立,但企圖利用你哋解決政治問題嘅係邊個呢?破壞法治係唔啱,但係邊個迫使示威者犯法,攪到你哋咁忙要成日執法呢?表面上好似支持你哋,大大聲講道歉係天方夜譚嗰個,煽動咗你哋出嚟打巿民,結果有人要坐,大糧都無埋,佢真係支持緊你哋,定只利用你哋為自己再上一層嚟鋪路?

廣告

警隊一向係紀律部隊之首,公認係最醒嘅紀律部隊,你哋一定明白自己係俾人擺咗上枱,騎虎難下,但再咁落去只會更泥足深陷,更加萬劫不復。接受成立獨立委員會還自己一個清白(老實講,你哋遮哂委任證,獨立委員會都查唔到你哋,只會查到落 order 俾你哋嘅人。咁大單嘢,無兩三年都未查完啦),何必要同跣你哋嘅人一齊搭沉船,讓你同你嘅家人受人白眼,被社會唾棄呢?

希望各位悟已往之不諫,知來者之可追,實迷途其未遠,覺今是而作非。

(標題為編輯所擬)

發表意見