立場新聞 Stand News

一帶一路特區忠字舞

2016/6/13 — 7:39

行政長官梁振英出席「一帶一路國際論壇2016」

行政長官梁振英出席「一帶一路國際論壇2016」

自梁振英在施政報告提出一帶一路振興香港偉大藍圖之後,得到中央大員張德江加持,來港為佢造勢。署理行政長官林鄭月娥周日出席一帶一路論壇時也不落後於人,力挺「一帶一路」是廿一世紀「最具野心的發展策劃」,認為早前張德江訪港時亦肯定了香港參與「一帶一路」的角色,呼籲港人應該把握機遇,與大陸企業開拓「一帶一路」市場。這場香港特區忠字舞,每位有志競逐特首者必須「落搭」高舉的一面旗幟。林鄭近期表現勇猛,頻頻撞閘,官威甚盛,尤其訪美之行敢於得罪美國華文媒體,大振聲威,一帶一路呢支旗,由佢掛帥,總好過民望低殘之689。

但地球上已經冇人能阻止689角逐連任,在中央領導人定下的發展總路線上要有所表現,所以佢一返香港見傳媒就表明要在今屆立法會會期,通過10億元的「一帶一路獎學基金」撥款,擬再硬闖財會。建制派議會首領曾鈺成立即眉頭一皺,屈指一算,9月立法會選舉在即,根本一帶一路十劃未有一撇,乃空中樓閣,689為何如此趕急將10億獎學金匆匆上馬呢?無他,根本原因又係鬥跳忠字舞,表演畀中央大員睇自己有幾咁支持一帶一路。但在目前中港關係惡化,《環球時報》上綱上線老屈何韻詩港獨,用文革扣帽子手段對付,激起民憤,一帶一路獎學金上馬硬闖,可以講係送個拉布議題畀泛民,以689之手段,隨時擺明挑機,將撥款申請排在公務員及立法會議員加薪申請之前,計算如果泛民拉布就攬炒。

臨近立法會改選,689唔應該再做無無謂謂的政治小動作,建制派議員媽媽聲,因為佢哋又唔敢得罪中央領導人pet project,但又明知選舉期近,一帶一路無米粥定必不受市民歡迎,拉布令泛民趁機得分,建制集體捱打,條氣最唔順係大家打完一輪,只係為咗689表演忠字舞。

廣告

香港商界中人對一帶一路不冷不熱,連應酬幾句都少見,原因係大家心知香港經濟起飛係靠跟隨二戰後美英自由貿易體系發展,美國當年在亞洲的「一帶一路」,有其核心價值理念,就是「自由」,在政治上圍堵共產政權,亞洲四小龍就是跟住英美,食住自由貿易條水,建立起出口導向經濟模式。

但中國𠵱家搞一帶一路,坦白講價值理念薄弱,而且「以我為主」,一睇就知為中國出口基建、技術、勞工、產能而設,越係講乜嘢「廿一世紀最具野心發展策劃」,建立乜嘢乜嘢橋頭堡,其他國家就越驚,表面俄羅斯、印度支持,實則處處設防,周圍落閘。最大鑊係強國人根本對一帶一路國家的文化歷史冇興趣,天朝心態,加上強國人恩主情意結高漲,視自己為救世主,介入其他國家越深就越多矛盾。六十年代美國建立全球經濟貿易霸權,除咗美元係全球通貨,民主自由理念外,還有二戰後遍佈全球的海外軍事基地做後盾。

廣告

呢場特區忠字舞,等如當年追求共產大鑊飯烏托邦,全民大煉鋼翻版,人人自High,本來香港人最講實際,在商言商,對呢味群眾運動式搞經濟發展有抗體,但而家時移世易,要「在政言商」,繼大白象大超支跨境基建後,今鋪仲吹得勁,一帶一路10億獎學金相信只係開始。

刊於蘋果日報

發表意見