立場新聞 Stand News

「一月下台論」引蛇出洞

2015/7/13 — 7:18

梁振英(資料圖片)

梁振英(資料圖片)

689明年一月下台?有冇咁筍呀?

傳言歸傳言,如果單憑曾俊華「習握手」及曾鈺成受狙擊兩單相關事件,推斷689正受整治,實在太有想像力了。無論如何,689都會做到任期完為止,實情他已進入跛腳鴨末期,早走遲走對大局冇乜影響。如果真係要佢走,只要佢在明年初「自行宣佈」不角逐連任,其政治效果同提早下台冇分別,民意會開始向中間轉,社會對立氣氛會即時緩和,而北京的面子也保住。

周四答問大會郭榮鏗問佢會否承諾不角逐連任,本來一條極容易耍過去的提問,佢都要左閃右避,神情古怪,明眼人都睇得出有啲古怪。周六上電台就自爆現時冇計劃連任,呢一刻冇唔代表下一刻冇,佢有位走,但仍然要公開表態,恐怕是為周四補飛,正因為到目前為止,佢好想去馬但中央並未表態支持佢角逐,所以佢唔敢亂噏,由此可見,而家正係佢生死時刻,分分鐘今周上京就會收到最新指示。

廣告

對689而言,今後兩年時間能討好北京爭取連任的政治工程當然不是搞好民生,而是搞好選舉。四場選舉接踵而至,如果佢能夠將泛民打殘,令議席在立法會少過三分一,失去否決權,下屆就可以「翻叮」政改,而前哨戰就係今年底區選。日前立法會答問大會李慧琼同689扯貓尾,由民建聯成功爭取全城清潔運動,實際是聯合選舉工程,屆時建制派地區樁腳及候選人就會拍住林鄭一齊做掃街Show,一如政改Show翻版,但效果亦可能一樣適得其反,比對手及社運人士玩殘。如此明目張膽利用行政資源為政黨助選,相信689為博連任,計謀盡出。其實只要佢肯主動宣佈放棄連任,建制派就已掂過碌蔗,使鬼搞大龍鳳地區Show!

政改被否決後,為了令七一遊行倒梁聲勢降溫,於是擺出一派溫和姿態,主動撤回創科局撥款,又約見泛民及自由黨,聲稱要改善行政立法關係,其實早應睇出係「玩嘢」。果然七一後見遊行人數少過預期,於是立即要求財委會加會,重提創科局撥款申請,再次觸發拉布。佢任期如果得五年,仲搞乜鬼創科局,擺明為咗政治鬥爭。今後兩年,要通過實際政績去爭取民意及建制派支持,殊不容易,民生重大政策如標準工時、全民退保,跛腳鴨根本冇足夠政治能量去擺平不同利益,點可能在十幾個月內交到貨。至於建屋問題,已擺出一副「走數」格,一味諉過於人,指責地區議會、司法覆核、城規制度,扮無知好似今日先至接觸房屋問題。現在689連任只有一招,就係博中央支持,大石壓死蟹,重演當年中央掃除所有競爭者,篤定老董一人參選,而令中央押注,就只有搞政治鬥爭,製造矛盾。

廣告

一月bye bye傳言,應該是挺梁陣營放出來的「測試氣球」,睇建制派反應,邊個人伸個頭出來拍手掌,或者踩多腳。大家見到范太小心翼翼回應,表示如果只得一個候選人,就會支持梁振英。戴晒頭盔作回應,以范太老練手腕,點會睇唔穿一月下台係引蛇出洞之陽謀。

發表意見