立場新聞 Stand News

一窺專業界別政改關注組系列:「藝界起動」Artists Action

2015/6/1 — 14:47

「藝界起動」核心成員莊梅岩(左)與「杏林覺醒」黃任匡醫生(右)@旺角街站。 攝:Una So

「藝界起動」核心成員莊梅岩(左)與「杏林覺醒」黃任匡醫生(右)@旺角街站。 攝:Una So

〖演藝工作者「藝界起動」Artists Action〗

由一班演藝工作者組成的「藝界起動」,剛加入成為第12個反政改方案的專業團體,這天在熙來攘往的西洋菜南街,首次參與街站。身為「藝界起動」發起關注組的核心成員,話劇編劇莊梅岩當日還是首次「嗌咪」,首次派傳單、落街站。



小組的成立十分迅速,莊梅岩說,源於幾個藝界較常論政事的朋友傾計,講及政府強銷「袋住先」方案,政改投票又將至,不如搞個平台,看看有多少人願意加入,為反「袋住先」發聲。

「大家一路傾,如果傾左之後唔做,都係因為懶,或者唔想做行前嘅人,都係『我不入地獄誰入地獄』!」她說。「好多時我地諗,『係咪應該係我地呢?好似有更多有代表性嘅人,件事會做好啲喎,會令多啲人信。』但我地等都等左好耐,不如我地自已生左先。」

落區前十多日前才第一次開會,再各自在facebook邀請理念相同的人加入群組。參與的有話劇中人、亦有來自表演藝界的舞者和音樂人,已有逾三百人加入群組。她多次強調,他們並不代表業界,而是一班關注政改的演藝工作者出來發聲,亦希望更多有能之士投身出一分力。

受先行者啓發

她直認今次演藝界敢出來,是受到11專業團體先行所激勵。「如果唔係11個界別走出來,我地邊會走出來?」她說。「人地做左囉喎!我地所有藝術家做咩鬼野?呢個唔係囉彩呀,佢地冇利益concern咩?佢地都有生活,但佢地都做,點解啫?佢地11個組別走出來,都係本著良心做事,我地仲可以沉默咩?我地都試下唔再沉默,先後唔重要,希望之後啲人唔再理咁多(個人利益衝突)。」

「有啲係咪唔好諗咁多,究竟個結果會點,首先我地唔係好睇個結果會點。我地講真理:究竟呢個方案得唔得?真係袋得落?你真係可以講呢個好民主喎!係一個question。我地唔係叫人企喺我地嗰邊,我地係叫人思考:咩野政府會叫人唔好思考要袋住先?你自己諗。」

生於這時代 就是有種責任

莊梅岩直言,藝術的使命就是追求真善美,眼見當權者眼睜睜說謊,絕不能袖手旁觀。「藝術就是真善美。而呢件事好明顯:我地係咪企喺、睇住政府嗰邊呃啲市民?我地至少要追求嗰個『真』。」她清晰地說。

要兼顧工作家庭,莊梅岩跟許多戰友,各自的生活都分身不暇,但仍願意承擔起這種責任。「其實大家都唔係好得閒,出來做咩鬼啫?I have many many things to do! 但依家呢個階段,呢樣野係最。重。要。所以就算我有deadline、就算我有屋企,就算我有好多其他野都要擺低。因為呢樣野係最重要。雖然我地都係算遲,都希望可以引起一啲關注、希望大家了解。」

「過去幾個月,政府手段好『辣撻』,不斷恐嚇你、話你聽係尾班船,你知不知呃嘅係咩人?係呃一啲好像我呢啲讀過書嘅,一見到大篇沉悶文字就覺得煩,但咁樣唔得𠺢。」 

她語重深長地說。「生於這時代,就係有種責任,真係要去睇清楚、諗清楚。」

荒誕劇天天上演

不少知名的演藝界人士如高志森和李力持等,在這議題上,都親建制和支持政改方案。莊梅岩說難以評論其他人的觀點,但會質疑究竟他們是真的相信方案,還是另有考慮,但她認為,不能因擔心作品能否北上而改變要求真的初衷。「我就係做呢樣野,唔可以再去諗,我咁做左會有咩得益、會有咩失去,就係咁樣。我相信一定會有人有呢啲concern,都係嗰句:如果我成日去諗成唔成呀、呢樣野有咩影嚮,我真係做唔到、冇路可以行。」

「我只可以做好自已本份,不斷努力同業界嘅人講,『我睇過喎,真係覺得有問題喎』,我咪同你解釋個問題係邊度,你同唔同意、支唔支持,都得個知字。」

她曾寫過一個關於新聞政治審查的劇名叫《野豬》,而其中的故事,早已在現實中上演。身為戲劇界的一份子,眼見政府高官每天都在演戲、扭曲偷換理念,她對現況感到悲涼。

「我地搞戲劇嘅,有喜劇、有悲劇、有荒誕劇...依家就不斷上演荒誕劇,如果我地比呢啲把戲蒙混到,我地真係走向悲劇。」她說。「我覺得難過嘅係,我地都唔夠醒覺,但係唔緊要嘅!每一個位都有個關口,問題係喺關口之前,我地點樣做多啲。」

西洋菜南街那天,不住地下著毛毛雨,莊梅岩頂著雨水跟筆者做訪問,臨行去「嗌咪」前,眼神清澈地說:「將來後悔嘅唔會係我、一定唔會係我。係呢件事裡面,我好心安理得,因為我已做左應該做嘅野。」

「藝界起動」核心成員莊梅岩@旺角, 攝:Una So

「藝界起動」核心成員莊梅岩@旺角, 攝:Una So

廣告

 

廣告

「...依家呢個階段,呢樣野係最。重。要。所以就算我有deadline、就算我有屋企,就算我有好多其他野都要擺低。因為呢樣野係最重要。雖然我地都係算遲,都希望可以引起一啲關注、希望大家了解。」她語重深長地說:「生於這時代,就係有種責任,真係要去睇清楚、諗清楚。」

藝界起動 Artists Action
杏林覺醒
Progressive Lawyers Group 法政匯思
思政築覺: 建築師政改關注組
量心思政:測量業界政改關注組
護士政改關注組
社工復興運動 Reclaiming Social Work Movement
良心理政 HK Psychologists Concern
放射良心
Progressive Teachers' Alliance 進步教師同盟
IT Voice 前線科技人員

 

原刊於作者 facebook

發表意見