立場新聞 Stand News

七百二十日的sosad

2016/11/17 — 18:18

太陽系九或者八大行星內,地球見到最光嘅星星之一,僅次於太陽、月亮同埋金星,最近距離5千5百萬公里,毋須借助望遠鏡,肉眼就可以喺漆黑嘅夜空,睇到光彩奪目嘅橙紅色星體 — 火星。

人類多次探險外太空,歷盡萬苦千辛,皇天不負有心人,上世紀六十年代,排除萬難到達火星,飛行日期計為:

第一次:228日(28.12.64 - 14.7.65)
第二次:156日(25.2.69 - 31.7.69)
最快一次:131日(27.3.69 - 5.8.69 水手7號)

廣告

720日。如果搭火箭去火星,最快可以來回2.7次,即係來回兩次有多,蛇一蛇落火星飲個Tea都得。但係,前朱警司涉嫌「棍毆途人」至今未有著落,唔通律政司起訴人去咗火星?就算係,都應該返咗嚟好耐,檢控定取消檢控,無辜定有罪,唔該還地球人前朱警司一個公道,一了百了,唔使等到人類登陸火星嗰日。

今年七月三十一日,我post咗篇文《六百幾日的無奈》,留言者眾,些牙都千幾人,對警察投訴科定為「證明屬實」嘅個案,點解要用咁耐硏究案情,無論係牛頭角順嫂,或者沙頭角村長嘅女「李愛」,連埋我咁蠢,𢱑穿頭殼都唔明,誓估唔到,咁快就過咗四個月。

廣告

上次咁樣講過:

「法律上,打人好唔啱,知法犯法罪加一等,但唔係嚴重到殺人放火作姦犯科,法官審完,咪知道清白定係犯法囉,有乜好拖;唔滿意判決,上訴再審過,直至有最終結果,呢啲咪法治精神囉。」

「一日唔審,畀人當賊辦,製圖控訴無日無之,抬唔起頭,又唔知會唔會被起訴,忐忑不安,對朱生唔公道,陷朱生於不義喎。」

「六百幾日唔審,畀人當官官相衞,公義盪然無存,得唔到彰顯,香港聲譽白白陪葬,叫人以後點信法治喎。」

「永遠唔審,一邊人話打得好,另一邊人話法治無囉,雙方針鋒相對,勢成水火,撕裂香港。拖得愈耐,傷害愈大,全民皆輸,點解咁傻?」

除非唔想當事人記憶清楚?唔想還朱生一個公道?唔想彰顯法治精神?唔想香港和好如初?我唔知點講,無言,speechless,七百二十日的等待,七百二十日的sosad。

 

作者 facebook

發表意見