立場新聞 Stand News

不可能返回的那一天

2019/9/9 — 9:36

盧偉聰

盧偉聰

大家試幻想,在另一個平行時空內,七警案審結之後,「一哥」盧偉聰召開了記者招待會。以下,是一哥的說話內容:

「各位記者朋友,香港市民,大家好。不久之前,一宗香港市民非常關注嘅警員襲擊市民案件終於完成咗整個司法程序,案中作為警員嘅同事,有部份最後獲釋,有部份需要入獄。我想就哩件事代表警隊講幾句。

首先,我代表所有同袍,衷心感謝所有處理過及負責調查此案嘅警察投訴科同事。你地要處理嘅係一宗公眾非常高度關注、案情非常敏感嘅案件。你地在調查過程中面對外人難以想像嘅壓力及挑戰,竭盡所能以獨立、公正、專業嘅態度去處理案件,將困難一一克服,並協助法庭尋找真相。你地無懼壓力、不偏不倚嘅精神,係每位同事嘅模範,亦讓市民同警隊可以重新建立互信。

廣告

接著,我要對此案嘅受害人曾健超先生致以最深切嘅歉意。我明白哩幾年間你經歷咗除咗身體上嘅創傷,精神上亦非常疲累。我就有同事在執行職務時越過咗合法嘅界線,令你受創,再一次鄭重道歉。同時我承諾會與警隊領導層重新檢視我地嘅行動守則,加強培訓,以減低同類事情再發生嘅機會。

對於幾位同事因為執行職務時超越法律界線而負上法律責任,我對佢地嘅遭遇非常痛心。我承諾會為佢地嘅家人提供一切嘅支援。但每一個學堂出來嘅同事都一定要記住自己背負公眾嘅期望,無時無刻都要堅守法律嘅底線,因為我地做執法嘅工作係響一條好狹窄嘅木橋上行走,一不小心就會知法犯法,跌落深淵。哩幾位因為過咗界而面對法律制裁嘅同事,有邊位唔係破過案立過功,唔係為香港嘅治安穩定作出過貢獻? 但係法律就係咁,唔會因為我地一世嘅貢獻而寬恕我地一時嘅過失。我希望每一位同事都唔好忘記入獄嘅同事曾經嘅付出,但更加要時刻告誡自己,緊守崗位,克盡己責,唔好超越法律界限,先可以無負我地離開學堂時嘅誓詞。

廣告

多謝各位。」

可惜,在哩個時空內,一哥只對同事受刑感到痛心,但連最起碼對負責調查嘅同事嘅表揚都無。

其實唔單係七警案,仲有朱經緯案。香港人其實已經一次又一次,比咗好多機會警隊及一哥。但係都一次又一次失望,一直至此,我地又點可以唔相信,警隊已經由上而下咁腐化呢?

 

作者 Facebook

發表意見