立場新聞 Stand News

不要689 2.0 — 別把希望放在候選人身上

2017/3/24 — 12:04

「在不義的制度之下,不論選哪一個人,都不能夠撼動政權,從而還政於民。」作者認為,為社會帶來希望的,不是一個英雄,而是「我哋每一個香港人自己」。(資料圖片:2014年9月26晚,學民思潮帶領莘莘學子「重奪公民廣場」,部份學生不能進廣場外,唯有在外聲援。)

「在不義的制度之下,不論選哪一個人,都不能夠撼動政權,從而還政於民。」作者認為,為社會帶來希望的,不是一個英雄,而是「我哋每一個香港人自己」。(資料圖片:2014年9月26晚,學民思潮帶領莘莘學子「重奪公民廣場」,部份學生不能進廣場外,唯有在外聲援。)

【文:Yuen Kin Yan】

前一個星期日,喺不太情願嘅情況下參加咗「不要林鄭」嘅遊行,唔係因為唔反林鄭而係因應唔想被騎劫左做撐薯片。

去到集合地點,果然如我所料,已經聽到人高談闊論胡官政綱不實在,林鄭乜乜乜⋯⋯一定要全投薯片。為住共同題目:不要689 2.0,行咗先算。遊行期間聽到「唔知係鄺葆賢陳澤滔係咪鬼」,「以後唔投長毛羅冠聰」;集會者發言當中不乏「選委要聽民意」、「原則派唔尊重民主」、「民主300+應該全投薯片」、「林鄭當選就係民主300+嘅責任」等等嘅論調,其中幾句我好想仔細回應。

廣告

未講之前利申2句先:

1.冇票 

廣告

2.連選選委嘅票都冇

(趕時間可以跳哂呢5點,直飛睇最尾)

************

一・「林鄭當選就係民主300+嘅責任」

作為公義嘅追求者,第一件事就係唔好誤導群眾。由於要過左半數先會當選,啫係林鄭得600票嘅話,不論民主300+分幾散都好、薯片得1票都好,林鄭都唔會當選。但只要林鄭取得601票,不論民主300+投白票胡官定薯片,都改變唔到林鄭當選。除非民主300+當中有人投給林鄭,否則林鄭當選點都講唔上係民主300+嘅責任。如果你覺得林鄭贏硬而你又好唔想佢做,你可以做嘅嘢唔係去民主派選委度洗版叫人支持曾俊華,而係同大家一齊上街抗議,記住網上啲嬲嬲唔係票嚟架。

我明最後點都有人做特首,但薯片唔贏唔等於林鄭贏硬,所以反林鄭係唔洗撐薯片嘅。

(註:本港法例第569章《行政長官選舉條例》第27條 第1款 :「如任何候選人在任何一輪投票中取得超過600票,該候選人即為在有關的選舉中的選出者。」)

二・「選委要聽民意」、「原則派唔尊重民主」、「民主300+應該全投薯片」

何謂民意?何謂民主?民主就喺大多數人嘅暴政嗎?民主就喺二元、非黑即白嗎?50%支持曾生就是民意,35%林鄭,10%胡官同剩返嘅白票通通都唔係民意咩?今次唔係Brexit唔係脫英呢啲是非題,今次係多項選擇題,點解全投曾俊華係代表民意呢?民主嘅真諦唔只係選舉贏輸,更係社會多元意見嘅表達,「唔投比曾生就係唔尊重民意,唔尊重民主」呢種講法先係最唔尊重多元,「我就係民意」只係藍絲思維模式。

再講All-in係咪真係代表到個50%民意呢?係呢個小圈子入面從來都沒有民意,我哋正正係因為咁先行上街頭,轉個頭卻在小圈子中找民意,係咪有基本上嘅邏輯謬誤呢?

三・300+係人民嘅代表

有人話「民主300+係人民嘅勝利,啲票係人民比選委嘅,所以選委要聽我哋講」。對唔住呀,嗰300+只係小圈子嘅勝利,唔係人民㗎,只係有一班民主派嘅特權階級贏左咋,我分享唔到呢份特權喎,更冇權去要求選委聽我講。呢個連階段性勝利都唔係,人民根本冇分到一分權力。

PS. 順帶一提見到梁家傑講下屆400+、500+ 真係火都扯,因為就算600+都係冇我呢啲Small Potato嘅份!說好的普選呢?命運自決呢?唔係你地300+幫我決呀!

四・PopVote問題

戴教授表示呢個係民投,唔係民調,但投票嚟講一人應該只有一票,但PopVote又比你投三票,然後計支持淨值。「民間公投」、「民間約章」、「民間特首」、「民間內閣」、「全文制憲」所有呢類型嘅公民活動都會摸擬一個理想嘅民主模式去做,一方面畀機會市民淺嘗更好嘅制度,提高市民嘅認同,另一方面突顯制度內外嘅落差。所以任何「民間投票」嘅運動都會以一個真正選舉去畀市民作出選擇。套用係今次選舉嚟講,你應該有1,2,3號同白票 4個選擇,而唔係支持定唔支持。

大家仲記得622民間公投吧?嗰時大家都只可以喺「真普選聯盟方案」「人民力量方案」「學界方案」「棄權」之間四選一,咁先係叫投票㗎嘛。

如果係想跟民間嘅選擇去投票,點解唔直接跟返選委嘅4個選擇畀市民揀呢?而係用「支持定唔支持」、「支持淨值」呢?講穿咗,根本只係一個bias sample嘅民調。然後仲要話跟呢個民調去投票,咁樣嘅「民主」未免唔太公義啦。

仲有投票連10%選民人數都做唔到就唔好拎出嚟啦,622個時有幾多人主動投票呀,嗰種先係公民力量呀。葉劉係地區都有六萬票,你得個十萬唔夠,仲要唔係100%支持,你話同我講有代表性。

五・有人話唔全投薯片就會打散民主派同民主運動

講呢種要脅式說話嘅人自己已經係分裂緊民主運動,仲要係為咗支持個建制派去要脅民主派。分裂民主派邊個最開心?

************

「真正不要689 2.0」

其實不論邊個當選,都只係「小圈子特首 4.0」,我哋唔應該為此你指我罵,邊個當選都一定唔會送民主比我哋,所以我哋嘅著眼點唔應該係邊個人度,以係應該放係「打破只有選委揀冇我揀嘅局面」上,應該有計劃咁拉倒小圈子政制,而唔係係小圈子入面苟且多五年十年。
首先,第一步我哋必要學會民主,減少謾罵多作討論。

民主唔只係多數對少數,民主係多元嘅共存同合作,而唔係你話我係鬼我話你黃絲豬。民主起源係由古希臘開始,最核心係有建設性嘅討論而唔係投票。民主唔係123投票睇下邊個人多啲,呢樣嘢正係建制派喺立法會做緊。

第二,在多元民主中找到聚眾點。

民主嘅聲音必定多元,所以民主冇唔分裂嘅可能,但亦冇唔合作嘅本錢。選舉從來都係令人分化嘅制度(特別係比例代表制),民主運動失焦變成選舉之爭,先有泛民本土自決之爭,再來白票薯片之爭。係時候修補關係,但修補關係嘅對象唔係同打壓我哋嘅政權,而係同不同意見嘅戰友。唔理係建設民主中國,我要真普選,自決定獨立都好,其實都走不出「權力歸於人民」呢個重點,其實大家仲有好多合作空間。

第三,重新回到民主運動,「希望在於人民,改變始於抗爭」。

雨傘過後,大家一直忙於選舉,但真係能延續雨傘運動嘅唔係選舉,能打破小圈子嘅,唔係選邊個,選舉往往只係一個造王嘅過程,將希望投放係候選人身上,但不必奢望特首有幾好,不必希望議員做到好多嘢,喺不義嘅制度之下,不論你選邊個都唔能夠撼動到政權,從而還政於民。

能夠同中共政權匹敵嘅唔係羅冠聰、游蕙禎、楊岳橋、朱凱廸,能夠對抗西環嘅更加唔係曾俊華。能夠同政權博鬥,為社會帶嚟希望嘅唔係邊個英雄,而係我哋每一個香港人自己。不論係白票定AllinJT都唔會撼動到中共,我哋講過”we’ll be back” 記住唔係入返立會就叫Back 而係我哋喺會重回民主路上,為自己嘅地方爭取多一份民主。

把希望放在自己身上吧,香港人!

************

最後最後:

我希望有人代表到我呢種意識型態。
利申:投左畀8號羅冠聰
最後最後最後
我屋企 老豆袁牧師就呼籲投JohnTsang,老母就反林鄭,我就堅持投白票,成日都城市論壇,但我地都唔會話對方鬼同豬。

#我就係鬼
#我曲線撐林鄭
#我真係冇票

發表意見