立場新聞 Stand News

「乜而家仲會有有能力嘅人入政府咩?」

2018/5/10 — 17:56

單景煒(網上片段截圖)

單景煒(網上片段截圖)

人在大馬,都忍唔住唔講呢單嘢。

琴日有朋友就send咗個報導畀我睇,就話政策創新辦嘅人選出台,問我點睇。我就問佢:「乜而家仲會有有能力嘅人入政府咩?」

之前個青年發展委員會,其實我都評過,最後成員名單好多都係青年組織、富二代、官二代班人,再加埋派餅仔畀友好政黨,最終都係門面嘢為主,實際有咩作用?對唔住,真係未見到。創新辦而家搵埋嘅人,數到嘅都係前記者兼前建制議員助理、團結香港基金等等唔同智庫嘅研究員,數來數去,班人其實都係同一個來源,就係要有建制味,而且仲要係三四線嘅建制人。當建制味咁濃嘅時候,又點會真係做到堆「創新」嘅政策?

廣告

同埋,而家個政治氣氛雖然未好似梁振英時期咁差,但都唔代表林鄭咁樣做就會可以「與青年同行」,吸引到一班後生而有能力既人入政府。雖則話,公務員年年請人,後生嘅就年年報名,就算去到警察都有大學畢業,可能參與過傘運既人報名,但創新辦呢種要拋頭露面,成為傳媒焦點嘅職位,一出來就可能要畀人認成世既,有能力嘅人除非有紅紅既建制心,又有邊個會出來做呢啲位呢?而同時,又要出面、但行頭又唔係副局、政助呢啲位,就算人工都算係ok吸引,一二線嘅人又點會願意屈喺呢啲部門仔聽人點,特別係聽班唔知係咪高班過自己嘅公務員、副局、政助點呢?

講到底,其實創新辦都係林鄭做出來,想搵後生既去endorse佢,喺當時同曾俊華較量時,拎返少少年輕人嘅支持,但好明顯就完全失敗。而去到而家,中策組冇咗,創新辦要頂上,又搵到一班咩人入去呢?咪就好似個委員會自薦計劃咁,政治成份良好,有一定背景,咁咪容易上到去做咁囉。而做得創新辦嘅,一二線人馬又點會屈就喺呢啲部門仔呢?而最後只得返三四線嘅人,能力、級數又有幾高?有冇大變,有咩意義,又真係諗唔到會改變到咩同有咩意義啵。

廣告

 

參考連結:Link

作者 facebook page

(標題為編輯所擬)

發表意見