假才子

假才子

比較政治碩士學歷,現為傳媒工作者。「假才子」是因為現在流行才子才女,但又沒人敢承認自己是假大空才子才女,故先行澄清。文章寫得不好還請見諒,畢竟我不是真才子。

2019/1/10 - 12:44

事頭婆唔退休 英國咪冇退休年齡?

特首林鄭月娥 12 月 15 日於維園工展會內購物。(資料圖片,來源:政府新聞處)

特首林鄭月娥 12 月 15 日於維園工展會內購物。(資料圖片,來源:政府新聞處)

特區政府將長者綜援領取年齡調高至 65 歲,特首林鄭話是因為香港人變長命,工作和退休年齡延長,又以自己 60 幾歲仍每日工作十幾小時為例,說明措施冇咩嘢。筆者一聽到就諗,阿頭做到幾歲下面就要做到幾歲,咁長和、恆基、澳娛/澳博、TVB(以前)的打工仔就死啦,個個唔做到 8-90 甚至 100 歲都唔得。再諗遠一點,事頭婆話唔會退休要做到死,咁英國咪全國人唔比退休?

筆者成日比人話個樣後生,有人就會加把口話我唔洗捱,咁我點都唔夠林鄭唔洗捱。林鄭話自己一日工作十幾小時,唔知係咪計埋去西環聽柯打、坐飛機上京覲見習總、去珠西考察大灣區、同政黨/富豪酒會飲飲食食嘻嘻哈哈咁呢?做老細仲有樣好就係可以自己改自己工作範圍,例如英文記者提問就唔洗答、邊啲議員就問題太無聊唔洗見、邊啲政府委員會報告同我諗法不符就掟埋一邊。仲有林鄭生活上都係唔洗捱。眾所周知,佢 N 年嚟都係有 AM 車接送同官邸住㗎嘛,唔係點會廿年前面世的八達通都唔曉用,或者唔識自己買廁紙呢?咁樣做到 70 歲,我都冇問題呀,不過一般打工仔女唔係囉。

唔知點解老細都中意用自己角度睇人,或者話當年自己點點點。好似廿蚊張話自己老婆當年大肚冇侍產假咁,張太大肚時返緊咩工我就唔知(我只知張太做過小學校長,因為我讀嗰間小學),但我斷估佢唔係做緊酒樓侍應或者廚房洗碗依類辛苦工啩?同埋當年點依家就要點㗎嗱?學人話齋,古代人夠冇冷氣冇電腦冇汽車,你依家又要用?當然再極品的就有 Package Lau,教人去少幾次日本就買到樓,唔知佢去一次日本係咪要洗一百萬,我去就洗一萬零㗎啫,去少一百次都未買到樓囉。好在賭王就唔會周圍鼓勵人要有多啲紅顏知己。

廣告

講返綜援。壽命變長,退休延長,醫療福利開支增加,的確係全世界國家都面對緊的問題,香港人亦遲早要思考「人生 100 年」(日本近年流行語)要點分配使用。但不同係,香港本身福利唔多,盈餘就勁多,根本冇人明邊度嚟咁大財政壓力要節省開支。要說服人,唔係用一句「我都 60 幾都仲返緊工」就得囉,唔該用多啲理據好冇?咁當然我都知林鄭一向唔係以理服人,係「我話 OK 就 OK」,即係好似佢唔知點樣就知道填海係最佳選項,又唔知點樣就知道填海獲得多數市民支持,可能又係神話比佢聽啦(即係幻聽)。一萬億丟落海就濕濕碎,長者定一般綜援爭嗰幾舊水婆乸數就計到盡,林鄭開頭成日講咩管治新風格,睇到啦。

 

作者網誌