立場新聞 Stand News

二百萬人遊行點滴

2019/6/17 — 1:54

1. 因為一早約咗要去探人,所以遲出發。出發時大約三點九,我住嘅社區出奇地靜,一點都不像平時的星期日。我知道,很多人已去了港島。

2. 由2003年開始遊行,咁多年,我從未見過今日咁多人。

3. 我真係從未見過咁多人遊行。

廣告

4. 第一次,見到告士打道咁多人;第一次,駱克道擠迫過軒尼斯道;第一次,錯過了大公報;第一次,看見咁多人對住灣仔警察總部舉中指——如果有辱警罪,今日有三份一香港市民入罪,可以迫爆全港所有差館。

5. 真係好多好多人。一般過咗軍器廠街,金鐘道條路闊咗,樽頸就完,會行得好鬆,但從未試過有一次遊行,金鐘道迫人得咁緊要,真係從未試過。

廣告

6. 今日有幾個第一次遊行嘅人陪同。

7. 警察總部吸嬲度真係史無前例,走完駱克道轉入軍器廠街,與警察總部有一段距離,會出現持續的「黑警」、「可恥」、「放人」、「警你老母」和大量中指,香港警察已成為香港人的敵人。警察成為林鄭嘅工具,依家搞到咁大鑊,所有警員孭晒鑊,成為中矢之的。你啲警察唔好怨,我呢啲算係好理智冷靜嘅人,經過警察總部,也不其然想起七八條速龍追打一個無反抗嘅示威者、狂噴鬼佬、兜頭射人阿媽、記你老母、自由西等等等等嘅畫面,係,唔關你哋守報案室嘅事,但你哋一樣要受。要平息呢份怒氣,一係盧偉聰孭晒,出嚟道歉,取消暴動定性,停止拘捕反送中示威者,撤銷起訴。不然,就算林鄭下台,香港市民對警察的怨恨也不會消減。

8. 沿途好多車泊低咗。如果係外國嘅大型示威,呢啲車被損毀係好平常,但喺香港,係一啲事都冇。有啲人會嘲笑香港人係和理非,唔夠勇武,仲以此自豪咁戇居。其實我覺得好好笑:(1) 和理非本來並沒有什麼不好,這樣的公民質素,一向是文明社會典範,但我們不單沒有民主普選,還悲慘到落喺中共嘅管治;(2) 有公民質素嘅人一定愛和理非,和理非本來就不是用喺抗爭,可憐的是,香港人被迫走上激進抗爭之路,和理非才變得不合時宜,試問誰想走這條路?(3) 就算係激進勇武,都唔關啲私家車事,香港人之文明,就係激進勇武總是對準目標,唔會為發洩而亂破壞,這是何等可貴、溫柔卻不屈的力量!

9. 是次遊行最特別的,很多人都帶着白花。我們已用破盡歷史記錄的步伐,代你前行。願你安息。

10. 香港,真的很美麗,多謝每一位走出來的市民。

發表意見