立場新聞 Stand News

亞視如何 香港政治也必如何

2015/1/23 — 20:00

【文:Joey】

亞視拖欠員工薪金,勞工處任由拖到年尾,終於發出共34張傳票追究 7至9月拖糧,但又唔申請清盤唔封鋪拉人,廣管局警告而唔釘牌,亞視員工戶口得番 $7.9 - 返工搭車食飯都唔夠,點算好?

欠薪七日,就已經要告上勞工處;欠薪一個月,即已「自動解僱」:何以唔「嚴正執法」?梁政府成日開口「依法」埋口「依法」,According to Law,亞視員工申請法律援助,入稟法庭申請欠薪僱主清盤或破產,法庭頒發清盤令出執達吏封鋪拍賣,破產欠薪基金就會墊支出糧,咁咪有錢過年囉。

廣告

受害人始終唔做,因為:1、程序需時約三至六個月;2、墊支有不同上限,亞視資不抵債,大有可能打折出糧;3、「亞視大家庭,做開有感情」云云。

I don't like blaming the victims. 凡可憐人,自有其可恨處:冇糧出你都照樣開工,出半份糧你又袋住先,那為何還要出糧比你?明明日日蝕緊錢,你死唔斬倉唔去止蝕,同個欠債老闆講「感情」?

廣告

有員工細細聲招認:其實亞視技術,多年來大落後,班伙記跟唔上外面影視發展,出去未必揾到新工。哦,原來一早廢咗武功,叫你永遠為奴,你冇錢開飯交租養家咩?老闆「大慈大悲」借錢比你應急再簽多張欠單:罷工辭工會比老闆追債?!

死唔死,追債變成欠債!

更難睇嘅係,老闆仲叫一班伙記排隊出鏡,乞求幫趁廣告才有錢出糧,嘔心!

有如你見住大陸街頭一班丐幫,有何感覺?你比錢幫亞視霸住個免費電視牌照,等於比錢大陸童丐:於是乎個乞兒頭可以捉多幾個細路、斬手斬腳繼續幫佢行乞?!

NO WAY! 熄大制,罷工,政府封鋪,釘牌,亞視清盤!香港人有錢有善心,倒不如成立「亞視欠薪救助金」,仿效碼頭工潮「左膠罷工基金」救工友於燃眉:典呀,「我討厭政治」唔想攪事,唔要做李卓人嗎?職工盟攪講座零出席丫嘛~

亞視無頼,映照香港政治同樣無頼:《基本法》45 條 68 條寫的雙普選,由07/08 拖到如今,2010 政改是是但但給你「五席超區」,民主黨就背棄五區公投入中聯辦「袋住先」,中共又使乜比你香港人普選呢?

8月31人大常委:「會議認為,2012年香港特別行政區第五屆立法會產生辦法經過修改後,已經向擴大民主的方向邁出了重大步伐。香港基本法附件二規定的現行立法會產生辦法和表決程式不作修改,2016年第六屆立法會產生辦法和表決程式繼續適用現行規定」

「理非」香港訓政:香港立法會2012 已經實現「一人兩票」,「功能組別都是普選」!當初為嗰「五席超區」食住先,今日中共就話「已經一人兩票」擴大民主「重大步伐」?!懶理你功能組別票價懸殊、公司團體票操控,立法會分組點票扭曲民意,鐵定 2016 分組點票依舊壟斷,功能組別一席不減,工商金融團體票死不放手,千秋萬代!當年白鴿「食住先」,香港人今日就哽死咗了!

今次政改,人大常委落閘,提名權由提名委員會「四大界別」 「1200 人」「過半數」操控,以北大人判定嘅「愛國愛港」限制香港公民參選權,以篩選冒充普選叫香港人袋住先?!若然通過咗,等同亞視員工追糧變成簽欠單:2017 就出三兩個「篩選人」,追逼你五百萬選民「一人一票」選特首啦 ~

睇到咁嘅政治現實,超人都止蝕走啦。國家同你講民族「感情」,董伯名句「中國好、香港好」,實情你愈依賴中國,愈沒有能力反抗中共,就如亞視被「技術邊緣化」的員工,日日返工拖得一日得一日,由勞工做到變奴隸,冇糧出都唔走得!

亞洲先生得 $7.9,香港人就有 689:就係同一個「四大界別 1200 人」選出黎!你唔服,要爭取「真普選」咩?「香港,終於有日要出動防暴隊、催淚彈對付示威者」,仲想「袋住先」?國安法都黎緊啦!

香港人,仲唔醒水 unfriend 中國,放眼世界莊敬自強,遲吓更加走唔甩。你,重未識個「死」字點寫?!

 

作者簡介:作為一個香港人,時刻發揮厚多士精神,生活上眼見怪事、錯事、愈來愈過份,一於插到佢暈!Never be afraid to say what you feel - You can only die once.

發表意見