立場新聞 Stand News

亡共必港

2019/9/12 — 18:21

今日係網台節目同嘉賓傾到中美關係,傾到香港其實好被動。最終的解決,其實就係中美問題的解決。而呢個亦係筆者同好多朋友既共同理解。

聽聞好多前線仔女成日想有終極一戰,覺得鬥死林鄭香港就有民主自由。非常可惜,事實係香港從來係國際關係中的一隻棋。咁講唔係想貶低香港。相反,對比起近日發生的事,香港呢隻棋已經無意中扭轉左國際局勢。

正如友人「演」所講,鄧小平係六四後留低左個絕好的局比中共。「五十年不變」,唔單單係講香港,亦同時留左時間比中共。如果中國一直韜光養晦,等到 2047,到時國力此消彼長,美國就未必係中共對手,人類亦必然深陷獨裁浩劫。但中共唔知痴左邊條根,竟然早左三十年玩大國崛起、世界命運共同體。真係天祐香港,令全世界係中共未完全成長之前留意到中共的國際野心。

廣告

前線日日面對手足、市民被毒打,一定係難以承受,亦難免覺得香港已經捱唔到幾多年。然而,如果以國際形勢分析,不難發現香港形勢正在大逆轉。五年前國際形勢仍然係世界各國趕住親近中國,五年後倒過來變成世界對中國的圍堵。主觀生活經驗上,中共對香港係前所未有咁壓迫,但中共的客觀形勢則剛好由盛轉衰。以今次反送中為爆發點,#Chinazi 開始成為一個國際問題。往後五至十年,必然係中共歷史上最艱難的時刻。

然而最麻煩的,正正係香港前線勇武與國際局勢扭轉的時間差。前線勇武用星期用日子來計算時間,但國際形勢卻係用三五年去睇。因為香港抗爭的原故,美國大選出現左一個民主人權議題,令美國民主黨搵到一個著力點去反 trump。因為 trump 原本只想講貿易講利益,但因為民主黨及其自由派媒體發功,輿論變成 trump 只講賺錢而漠視人權。當 Fox news 都開始講香港,咁 trump 就冇辦法只論貿易,要落水為香港民主人權發聲。美國政壇因為即將面對大選,已經開始上演鬥反中共遊戲。呢場戲先剛剛開始,卻係中共三十年榮景的終結。呢場戲至少可以玩多三五年。問題係前線抗爭者等唔到。太多人覺得再攪三個月、半年已太耐。但呢個時候,最需要反而係耐力。要等全球對中共的圍堵慢慢形成。到時中共滅亡就唔係天方夜譚。

廣告

我地要明白及接受,林鄭唔係香港民主的終極障礙,中共先至係。中共不亡,香港就唔會有民主。好多人想像唔到中共滅亡,所以成日想收場。但恐共的諸君,請留意國際風向。因為習近平的提早崛起,中共對香港、新疆的倒行逆施,中共滅亡已經係一個現實可能。只要多等五至十年,等全球反中共網結成,就係中共倒台之日。此前香港要做的,唔係送頭,而係多做國際連結,令香港上國際版,令各國自利的政客為左選票反中共,結成反中共包圍網。唔好睇小自己,美國民主黨已經好好咁利用香港去反共,謀選票。如果唔係香港人和理非同勇武拍住上,根本唔會有而家的局面。只有香港繼續成為棋子,成為國際反中共的藉口,廉價的選票提取機,咁先會積極咁推動國際反中共聯盟。

呢場仗至少要打多五年。10.1 唔係終極一戰,只係全球反中共戰爭的序幕。

發表意見