立場新聞 Stand News

京官稱政改實踐後可修改 陳文敏:即是不會改

2015/4/30 — 14:25

資料圖片:陳文敏

資料圖片:陳文敏

大律師公會引述京官表示,特首普選要「實踐」過才可以修改;港大法律學院前院長陳文敏認為,中國官場的說話中,說要等實踐經驗再改,其實即是告訴你不會改,訊息已經非常明確;加上特首選舉已與國家安全掛勾,這一點不會於短時間內改變,「就算到時肯按實踐經驗改,都唔會有咩可以改」,因此政府宣傳指通過政改是「踏前一步」,「可能就係得嗰一步」。

陳文敏今早接受商台訪問港台引述他受訪後見記者時稱,認為政府上週公佈的政改方案只是將「入閘」門檻降低,沒有回應市民有關篩選的憂慮,他形容現在的方案看不到前景。陳文敏表示對政府公佈的方案感到失望,認為只是把入閘門檻降低,但只要「出閘」的過半門檻不改,入閘門檻降低是沒有意義。

陳文敏又形容,政改的重點不是「踏前一步」,而是可否繼續向前行,要有客觀基礎「袋住先」之後有優化,才能說服市民支持。他指出,港府上下以及前特首董建華,也無法形容今次的方案是一個好的方案,只能形容是「民主起點」。

廣告

中國官場嘅說話,當你話要等實踐經驗,然後先至改呢,即係話畀你知唔會改嘅,唔係袋一世,都可能要袋半世,個訊息已經好明確話畀你知,改梗係可以改,但係等完實踐之後呢,你都唔好期望短時間,或有生之年會見到一個好重大嘅改變。咁佢再加多個框落去,改一定要符合《基本法》,就咁睇當然係無可厚非,但係過往我哋睇到,中國官場嘅所謂符合《基本法》呢,即係嗰個831框架係度,就算改都唔會改呢個831框架㗎啦。


喺成個《基本法》入面,佢哋已經提升到係,其實特首選舉係涉及國家安全,咁呢啲嘢唔會話過幾年會變㗎嘛?如果我要一個安全系數好高嘅選舉模式,呢個都唔係過兩三年會改變嘅嘢。即係話畀你知就算佢肯改,到時實踐經驗改呢,你都唔會期望有咩可以改㗎啦。如果我哋期望接受呢個方案,係真係「民主踏前一步」,可能就係得嗰一步,冇再前,呢個係咪我哋想見㗎呢。

就算我哋踏前一步,政府個講法都係,如果我哋唔踏前一步,就會斷送民主,我諗大家好難去說服大家,因為大家都喺度估緊中央會點樣做。我哋調返轉講,如果45條《基本法》嗰個要求話最終達致普選方案,如果而家做唔到,咁你話畀我知而家做唔到,中央就唔會再做㗎啦,咁你點說服我話,如果我而家做到,佢仲會繼續優化呢?做唔到你都唔做喇,咁做到仲可以點樣優化呢? 如果到時2017個選舉佢覺得順利,亦都冇誘因要去繼續優化,如果個選舉到時唔順利、有好多阻滯,咁即係國家安全嘅系數仲未夠喎, 咁只能更加收窄㗎啫。越講,就越覺得冇得再優化。

陳文敏指現時的方案難以接受,但認為是可以修改,如擴闊提委會選民基礎等,主動權在政府,而831方案未有具體規限的選舉階段,改動空間最大。他批評在目前方案下,候選人只要能夠出閘、贏到對手就可以當選,毋須過半或較對手多一定比例的得票,候選人沒有誘因對「500萬選民」負責,而只需要對提委的1200人負責。

廣告

發表意見