立場新聞 Stand News

仇恨氣息瀰漫香江 拯救香港刻不容緩

2019/7/21 — 14:15

資料圖片

資料圖片

【文:一位熱愛香港,為香港引以為傲既市民】

香港係我地既「家」,但呢個家現在比霸權、比誠信破產、比有違專業、比目無法紀既人使橫手搞到四分唔裂、滿目瘡痍,我地作為呢個家既一份子,要不分你我,放低仇恨,一齊修補已經傷痕累累既屋企。相信呢個幾月來大都好辛苦,亦都好痛心,點解自己出生成長既屋企會變得如此黑白混淆、晦盲否塞。社會越來越充斥住仇恨,果種氛圍直頭令人窒息,我雖然唔係係香港出世,但有著切身感受,尤其 6.16 大遊行裡面,那「痛心疾首」四個大字,久久未能忘懷。

1998 年既暑假第一次踏足香港呢片土地,當時重係中學生既我覺得一切都好新奇,覺得地鐵好先進,好多車尤其雙層巴士好犀利,啲樓好高,警察比起公安更整潔、更有威嚴,仲記得果陣每個禮拜都會睇警訊,就算入面播既祇係模擬片段,但係都覺得好有型!相信係果個年代,投身警察為民服務會係好多人既志願,能夠扶老攜幼,保護市民,係一種光榮;除左切身既感受,香港重教識我咩叫「民主」同「自由」,有啲話題祇有係擁有自由氣息既香港先可以討論,例如悼念「六四」既大遊行就係我第一次接觸到既「自由」既象徵。大鄉里出省既我當時重經常同身邊既同學仔分享內地學校既野,例如有咩科目,數學會教啲乜野,簡體字點寫等等,老實講我而家都幾乎唔記得晒啲簡體字係點寫啦。但隨著中港兩邊走(因為重有屋企人係內地),我慢慢發現原來有好多野大陸係不能褻瀆、不可討論,就如今次年輕人用生命守護緊既「自由」、「人權」、「民主」同「法治」。

廣告

捍衛香港法治 勢保自由香江

係香港生活、接受教育,再投入社會,雖然深深明白民主既重要,但我同好多香港人一樣,一次遊行都無去過,甚至無盡過一次公民既責任。然而 6.9 係人生第一次走入人群哎起口號,尤其當眾人高叫「香港人加油!」既時候,眼淚竟然不由自主地湧出來。天真既我諗住有破紀錄既 103 萬人出來反對,政府應該會聽取民意,撤回惡法,結果係果晚我體會到乜叫「面目可憎」,果一塊不可一世、猙獰既面孔我一世都會記住。因為林鄭月娥無視民意導致 6.12 警民衝突,本來係暑假應該去旅行、去打機、去 shopping 或者係屋企開住冷氣頹住過既後生仔女,逼住為保衛自己既未來而行出來抗爭,搞到比警察暴打,食催淚彈、胡椒噴霧、橡膠子彈重有布袋彈,受傷血流披面,最後換取到既竟然係大人冠以「暴徒」之名。

廣告

請問佢地「暴」係邊度?

係因為設下路障阻止警方前進?

係因為用把遮擋住警察既警棍同胡椒噴霧?

係因為將警方發射既催淚彈掟翻轉頭?

定係佢地有殺人放火燒車搶劫圍毆警察啊?

我祇係見到班學生真真正正既扶老攜幼、互相幫助,為在場既市民同手足前仆後繼。佢地祇有一把遮,一個工業用安全帽,一個眼罩同一個普通口罩而以。請問佢地可以有幾暴力!?如果佢地真係暴徒,點解當時無警察重傷?點解祇有學生比警察兜口兜面開槍射到當場吐血?

當啲後生出來保衛未來比人打到口腫面腫既時候,我地呢啲所謂既大人去晒邊阿?唔係指責佢地暴力,就係度批評佢地破壞左 103 萬和平遊行既光環,如果 103 萬和平遊行係有用既,佢地重使乜出來抗爭啊?邊個傻到會中意比人打?重夠膽話佢地收左錢!?不如我比錢你你出去比人打吓啊!下下扑頭喔!中國人文道德教我地要扶老攜幼,老吾老以及人之老,幼吾幼以及人之幼。但作為大人既我地又有無挺身而出保護呢班細路啊?反而係呢班率直、擁有赤子之心既細路,為我地呢班已經被社會腐化既大人獻出血肉之軀。 6 月 15 號第一位年輕人獻出自己既生命以死明志,以淋漓鮮血控訴暴政。6.16 逼得 200 萬零 1 名市民上街遊行反對惡法,要求政府全面撤回,但林鄭月娥及其政府班子不但無正視年輕人及 200 萬市民既訴求,更消聲匿跡。哀愁瀰漫整個城市,導致 6 月 29 號第二位年輕人失望至極,祈望用生命喚醒呢個政府;可惜,6月 30 號第三名年輕人絕望而去。

是你教我們和平遊行是沒用的

7 月 1 號,香港回歸既紀念日無錯係值得政府重視,但當社會出現重大分歧,長時間出現大型示威抗議,警民出現嚴重衝突,更有市民一而繼繼而三咁因社會撕裂絕望殞命,一個文明社會負責任既政府理應取消所有無謂既活動,調解衝突,安撫市民,修補社會,甚至下半旗以表社會動盪帶來既悲痛。但呢個特區政府,無視社會既一切不安、悲痛、動盪,無視市民既高聲吶喊,無視年輕人被武裝警員打得血流披面,無視社會既憤怒。依然故我,充耳不聞,係正在發生緊衝突既另一邊閉門自娛,依然放不下形式上既阿諛奉承,繼續一啲無意義、無幫助既儀式。年輕人實在黔驢技窮,逼不得已下以佔領立法會給予世人知道,呢個政府有幾漠視民意。明知山中有虎,明知刀劍在近,仍含淚上陣,寫下一幕一幕令人痛徹心扉、鏤心刻骨既畫面:

「是你教我們和平遊行是沒用的」

「齊上齊落」

「個個都好驚,但重驚聽日見唔到佢地四個」

「一齊入來,一齊走」……

三位年輕人既離去卻換不到政府既一聲慰問,反而幾塊玻璃既破碎卻令政府以風馳電掩之快出來譴責,年輕人既訴求依然被拋諸腦後,真正令人髮指既係呢個不義政權,而唔係捨身取義年輕人!7 月 3 號我們痛失第四位手足,四位市民以死進諫,政府依然視之不見,聽之不聞,剩係識坐係冷氣房既人繼續不負責任地,利用譁眾取寵詞語、文字挑起仇恨,利用各種手段鎮壓及阻止示威遊行活動,恨不得社會進一步撕裂、警民進一步反目,漠視年輕人同前線警員既生命,誓以血流成河終結一切。

不義政權 還值得你擁護嗎?

7 月以來接連每個禮拜都有示威遊行,盡管遊行如何地和理非,前線手足如何地克制祇守不攻,以堵塞換取關注、回應,但警方每次都以不合比例既武力攻擊示威者,驅散卻又拘捕,呼喝你走卻又圍堵唔比你走,是否很矛盾?我唔明白指揮既警官係真心以維持秩序出發,定祇係利用前線警員同示威者以藉此發洩。令到警員同示威者之間既矛盾越積越深,互相仇視。本是同根生,卻視對方為敵人。然後祇係坐係冷氣房既什麼署長、什麼局長、什麼會長就走出來機械試譴責,不單對事件毫無幫助,更火上加油,佢地祇係利用警員同示威者完成佢地某些政治責任,甚至達到其政治利益。

至於果位所謂既行政長官,特區之首,除左係 7 月 1 號晚衝出來讀稿譴責之後,再一次消聲匿跡,若果唔係李國能大法官仗義執言,林鄭月娥都唔會係 7 月 9 號出個壽終正寢之回應,盡管回應,都係繼續無視市民既訴求,無視李國能大法官既建議,繼續高傲自大,旁若無人。佢口口聲聲話要「謙卑」,話要聆聽市民意見,話要多聽年輕人既聲音,敢問佢有邊樣係做到?佢係 7 月 1 號既早上先對住一眾高官、社會賢達、中外記者話要聽年輕人既聲音,到晚上出現衝擊立法會如次緊急情況下,佢竟然斷言拒絕民主派人士既緊急約見。一切都祇係謊言,祇有繼續無視年輕人、譴責年輕人,將仇恨推高。咁樣既政府,咁樣既特首,重值得社會各界、各級公務員團體、各位香港市民繼續支持嗎?重繼續比佢分化社會、撕裂社會嗎?希望各位一齊發聲,爭取由 7 月 1 號金鐘宣言 / 香港人民爭取其應有之普世價值及社會制度宣言所後續之五大訴求:

1. 撤回修例

我地要既係法律上既真正用語,「撤回《逃返條例》修訂草案」,而唔係咩「暫緩」或「壽終正寢」。唔好用言語上既偽術蒙混市民,更加唔好講咩「唔好執著字眼」,法律就係要執著「字眼」,法律條文每一粒字都必須準確無誤,講得出「唔好執著字眼」既人簡直枉為律政司長,簡直係專業失當。如今社會一切不安源自呢條修訂草案,所以必須「撤回」,以祭亡靈!

2. 收回 6.12 暴動定性

沒有暴徒祇有暴政

若唔係一班年輕人、一班學生走出來抗爭,以血肉之軀阻擋立法會對《逃返條例》修訂草案進行二讀,相信香港法治已遭受無可挽回既傷害,「一國兩制」將蕩然無存,香港國際地位將一落千丈。受害既當然唔會係一眾高官同埋保皇黨,祇會係我地一般既市民,甚至社會上既商人、賢達。 6.12 警察使用過分武力無從置疑,其過火行為係所有記者拍攝既影片相片中一目了然,可恨既係,林鄭月娥,保安局長李家超同警務處長盧偉聰互扯貓尾,互相推卸,前言不對後語,圖以混淆視聽,蒙混過關,實質將年輕人以暴徒之名予以控告,將當日之抗爭運動冠以暴動之名以抹殺其意義。從來祇有官逼民反,政府必須正式收回 6.12 暴動定性,還抗爭者一個公道!

3. 不檢控及釋放所有被捕示威者

得民心者得天下,盡管示威者阻塞交通、破壞立法會數塊玻璃同塗汙某幾處地方、圍堵警總,係法理上確有理虧,但一切源於政府出錯兼拒絕聆聽市民心聲所導致,祇有政府放下身段,踏出第一步釋出善意,社會仇恨才會得以舒緩,人民心結才會得以舒解,民心才會歸向,否則社會撕裂祇會加劇,導致無法挽回既創傷!未來係年輕人既未來,政府係咪要失去整整一代既年輕人先至心息?如果咁樣,香港還有未來嗎?

4. 成立法定獨立調查委員會徹查警民衝突

警民對立升溫,彼此視對方為仇人,衝突不斷加劇,無論係邊一邊受傷流血,對香港來講都會帶來無可挽回既傷害。有人語帶相關咁話唔會出賣警察,咁係咪意指香港既市民就可以出埋、可以無視?又有人話成立獨立調查委員會係針對警察,錯啦!獨立調查委員會唔單止可以還原真相,還示威者、受傷既學生一個公道;同時都還警察一個公道!前線警員奉命行事,究竟係警隊入面邊一啲人誤判形勢,甚至係刻意下達不法不義之命令,令前線警員處於一個給人冷血、有違專業、知法犯法、目無法紀既黑警局面;亦不顧警員人身及心理安全,令警員受傷及情緒處於崩潰既臨界點。警察係 7.13 上水遊行清場行動中,嚇令一位有行動不便既 16 歲少年跳橋逃生;以及係 7.14 沙田遊行中衝入商場圍堵示威者,係商場大肆攻擊示威者,就係好明顯既「利用」、「誤判」甚至係「刻意」既布局,及情緒失控既後果。

各位警察同儕 勿忘初衷

我明白最近各位都比市民鬧係黑警既不愉快心情,亦都明白你地聽從命令既需要,但你地可以自己決定如何執行,就好似 7.17 銀髮族遊行既時候,一班婆婆對你所講咁,你可以驅趕、可以打一下令佢地撤走,但唔好咁大力,會痛架嘛!點解重要出盡洪荒之力咁下下扑頭呢?難道你地覺得咁係正確既使用武器方法?學堂係咁教既?唔好話市民唔公道,知錯能改善莫大焉!

今日黑警之名確係難受,可能會換來某些協進會、同鄉會、理事會既捐助,或一些有組織既撐警活動,短暫地給你地戴上光環,但撫心自問,呢啲真係真心既?無任何政治目的既?無任何政治利益既?相信各位警察唔係傻,唔會諗唔到你地祇係比人擺左上台,祇係在於閣下會否蒙蔽自己既來良心而已。請各位撫心自問,你地中意好似而家咁,祇係得到果啲受政治任命既團體作出既虛偽支持;還是想得到每位市民報以感激既眼神及由衷既感謝的那份光榮?勿忘初衷,你地投身警隊係因為自己既正義之心,還是想成為當權者行使霸權所利用?成為當權者完成政治任務得到其政治利益而犧牲既棋子,還是當一位受人民敬仰受人民報以笑容既警察,在於閣下一念之間。過往警隊係世界出名既菁英部隊,何以現在受盡責備,被批評濫權濫暴受國際批評既合法三合會?是否甘心繼續被林鄭月娥所利用,被盧偉聰拎去做擋箭牌,等佢地可以繼續步步高升?

每位市民都感激警察為民服務所付出既血汗,祇係不削你地蒙蔽自己良心既行為;市民唔係立心與警察對著幹,祇係反對成為不義政權既走狗。尚若警察同儕能夠協助、保護市民反對暴政,市民必定為警察護航。

5. 落實真.雙普選

國家之本 在於人民

明主之為國也,任於正,去於邪;忠而能仁,則國德彰;忠而能知,則國政舉;忠而能勇,則國難清。特首啊特首,仁政更勝千軍之力,才能彰顯賢德啊!2014 雨傘運動,市民和平表達訴求,希望如實實行《基本法》規定既雙普選,可惜遭粗暴干涉及制止,到而家依然遙遙無期。相信特首閣下應該體會到,缺乏民意既授權,缺乏民心所向,政府施政祇會步步維艱,今次社會動盪就係缺乏民意、忽略民意既後果。

特首,你話你係香港既母親,咁就請你勇敢地企出來,為調解社會既紛爭,承擔一切!停止一而再再而三既刻板、挑起仇恨既回應;停止動用香港所餘既價值,為不可能亦不應該既政治任務孤注一擲。正所謂「虎毒不吃兒」,點解你重要推你既香港兒女去死?警察係你既兒女,示威者都係你既兒女,為兒女付出一切係體現母親既偉大,希望你講得出就要做得到,唔好再使手段加劇香港現時既動盪不安啦,好嗎?

古有明君下詔罪己,我地唔使特首你道盡自己既罪狀,而係希望閣下能真正為香港好,為香港做番件好事,重啟政改,盡快實行雙普選,還香港真正既民主、還人民真正既自由。尚若閣下身上有任何制抓,請你勇敢面對,香港人必定為你護航對抗惡魔。

感激記者朋友、救傷隊朋友、醫護朋友

呢個多月以來,無論大大少少既遊行、抗爭,盡管前線有多危險,記者朋友同救傷醫護朋友都克己盡責,為報到真相遊走於危險之間,為拯救傷者奮不顧身,多謝你地。全靠記者朋友,真理才得以彰顯;全靠救傷醫護朋友,市民生命得以保障。當眾人責備示威者係暴徒之時,多得記者朋友還原真相,道出誰才是真.暴徒;當示威者被打得頭破血流之時,多得救傷醫護朋友排除萬難為傷者提供急救。希望往後艱難既時間,記者朋友同救傷醫護朋友可以繼續與我們同行,一齊為香港既明天努力。

起來!不願做奴隸的人民

立憲政體,取決公論。懇請香港各界、各級部門、賢達、各位市民繼續為守護香港自由、人權、民主同法治發聲,繼續逼令無視市民既政府正視市民既訴求,做一個有擔當既政府。

1. 而家呢個特區政府為達目的無所不用其極:

2. 佢利用警察,扇動資訊不足既市民以至人民鬥人民既情況;

3. 佢更染指教育,製造白色恐怖,務求令家長恐懼,破壞中國人重視家人關係既人倫道德;

4. 佢偽造罪名控告調解紛爭既教師,脅令教育界;

5. 佢利用民生,利用整個政府架構為其護航,模糊視線;

6. 佢更利用不法組織破壞市民自發運動,凌晨數百人破懷大埔連農牆已經昭然若揭;

7. 佢利用及扇惑地區人士對示威者作出恐嚇,務求制止遊行於各區進行,那張元朗 18 鄉話要打到帶口罩既示威人士手斷腳斷就係證據;

8. 佢動用各親中組織招攬網絡打手,散播及抹黑示威者同支持示威者既政黨,誣衊佢地收受利益,但我地眼見既,係邊個不段捐錢收買人心?

9. 佢利用制度,對申請遊行提出諸多不切實際既限制,兼且無視已發出既不反對通知書,出爾反爾;

10. 佢動用大量財力物力,收買人心,出力組織撐場活動,為活動封鎖周邊,卻限制反對既遊行,只許州官放火,不許百姓點燈;

11. 佢不斷透過不同組織、活動、社團、保皇黨喧染示威者暴力,敢問示威者有無傷過市民?有無打家劫舍?有無殺人放火?比人打到頭破血流係示威者,比人圍堵既係示威者,比人近距離噴射催淚噴劑、胡椒噴霧既係示威者,比人圍毆既示威者,比人無理控告既係示威者,呢一切一切都有片有相為證,佢地祇係打爛幾塊立法會玻璃遮,咁就要置佢地於死地?

12. 呢個林鄭政府所做既壞事簡直罄竹難書。

大家試想想,200 萬零 1 人遊行後,政府及一眾保皇黨假惺惺咁出來道歉,話應該檢討,話政府工作不足,建議政府面對市民回應市民。然後再沒有然後,180 度地反過來支持政府,支持警察施暴,喧染示威者係暴徒,卻對事實選擇視而不見!市民同示威者從來都冇主動訴諸暴力,從來都係警察是用過分武力暴力清場,唯一見到示威者懲罰警察既場面,就係因為警察使用計謀,意在大規模圍堵及拘捕示威者,不惜衝入商場,不顧行人安危,係商場大肆施暴下,逼得示威者反擊!如此不堪既警隊高層至前線於不顧既戰術,果啲所謂既保皇黨,香港穩定支持者點解視而不見、聽而不聞?

孟子曰:「民為貴,社稷次之,君為輕。」一個拒人民福祉安危於不顧既政權,又點可以帶來安穩既社會?又點可以振興社會經濟?令市民安居樂業?請各位不要是非不分、本末倒置。香港孕育出好多出色既市民、社會賢達,過去既香港成就了你們,而家香港生病了,希望得到救治,懇請香港各界、各級部門、各位賢達、各位市民挺身而出,為香港真.發聲,守護香港,受護為香港血肉奮戰既年輕人,守護我們珍貴既「家」,拒絕做霸權下既奴隸!

一位熱愛香港,為香港引以為傲既市民

發表意見