立場新聞 Stand News

今日,我家姐帶左膠男友返家食飯

2015/4/6 — 17:33

夕陽起伏不定,註定今晚不會平靜。我如常七點到廚房問老母食得飯未,左腳踏入,我滿目驚奇:又蒸石班、又切雞,香港光復慶祝嗎?「今日家姐第一次帶男朋友返黎,咪失禮人嘛!」雖然老母劏雞劏到甜絲絲似嫁女,但我深知家姐所托非人,因為……佢條仔係賣港左膠!

我依稀記得兩月前退聯,佢FB留言:共產黨最開心。加上此廝畢業自中大政政系,自是左膠保證。為了家庭,我勸老母:「不如收埋隻雞脾啦,我聽日放假可以淥麵麻!」「你都痴q線,招呼客人麻!」唉,左膠賣完港就入侵我屋企,搶奪本土資源,今晚就係勇武揭竿之時!久習國師realpolitik,我相信今晚驅逐行動有盟友,因為我老豆係藍絲……………

「伯母你好!我叫家強!」一開門,只見我家姐拖住條左膠,如港女拖洋腸般發浪。而我,而聞到陣陣左膠味猛攻:四眼、瘦、七三分界、牛仔褸、布鞋,一派偽文青模樣。佢左手提著一盒東方紅禮盒,我兩眼一督!竟然是花膠!「左膠送花膠」太有自知之名了!

廣告

「阿仔,食得飯,幫手開枱!」我率先布置飯桌,立時變成四方城戰格局!先介紹一下陣容:

東:老豆,藍絲,曾去旺角食花生怒鬧佔旺廢青;
南:老母,政治冷感;
西:黃絲家姐加左膠男友,「今天我…」唉,和理非非晒9氣;
北,我,本土勇士,高登名為「塞左膠入洞」,FB言論曾獲國師點名稱讚,曾秘密去元朗低調光復。

廣告

-------開枱---------

全部人安坐,我老豆先刺探:「家強,你兩個剛才去邊頭玩呀?」左膠不虞有詐:「去咗睇戲,劉德華套《失孤》,講拐賣兒童,幾慘!」左膠率先露出大中華情花毒皮相!我心諗:地獄鬼國賣仔拐仔好出奇咩?作為一個藍絲,老豆應該即刻大罵佢對鬼國有偏見!

豈料,藍絲老豆竟說:「又係幾慘!大陸係好多拐細路衰人!」老豆竟然流露出滿意表情,去贊同條左膠?都話共匪同左膠係合流㗎啦!

無計,到我勇武出招:「家強,好似你上年都有去佔中喎!」一招敲山震虎,條左膠被我殺得措手不及。老豆怒道:「咩話?家強有去佔中?」客廳頓時氣氛急轉直下,有如慈母清場前的緊張。此時深藏係老豆心中嘅藍絲暴怒猛火正待爆發!左膠男友一時陷入困境:「我我我…」!只消我行動升級,相信老豆就會即時清場--將枱上的白切雞收起………

「咁家強讀中大政治,去睇下有咩出奇?」家姐見勢色不對,立即助拳:「咁細佬你都係本土啦,上星期仲靜靜雞去咗元朗!」想不到家姐為條仔再自引櫻槍上陣,一出手就督灰,仲轉身射個三分波!老豆、家姐瞪著我,我猶如金鐘的勇武派,頓時被大台左膠同警察夾攻!

「其實激唔激,都係觀點與角度,要討論香港政改,要先定義咩叫民主,其實柏拉圖……」左膠男友忽然唐僧上身無間斷講理論,由柏拉圖講到孫中山再講到……究竟是打圓場還是解救我,不消三分鐘後合家都聽得呆若木雞。左膠原來還是煩膠……

「啊,其實家強你,住邊㗎?」政冷感的老母終於發言,整晚最重要的問題!成功打破唐僧攻勢,投下理論核彈!

決戰時刻終於來了,究竟今晚是藍絲勝、本土光復、還是左膠永續!?

全家就等這句,比人大831更具決定性,更不能推翻的一句!只見左膠信心滿滿的接話:「我住天水圍,不過剛剛抽到居屋。」

乜春吖!問你住邊9唔搭8都要加句「抽到居屋」!然而,當我一轉身,靈異一幕出現了。老豆老母疑似中風呆住,一直張口,足足有十秒。到他們恢復活動能力,做的第一件事就是:夾雞脾!老豆老母一左一右,熱情地送上左膠的飯碗。我只能暗自譴責:左膠真離地,左膠真虛偽……

-------收枱---------

後記:左膠男友食完飯,入了家姐房廿分鐘。老豆老母笑得見牙唔見眼。最後,家姐送左膠男友出門口,他走前,搭一搭我肩頭說:「其實我都有睇本土派,好似陳劍青個本土研究社,幾正,得閒交流下!」

我心下一陣茫然,完全唔知佢講乜春陳劍青,只得望著他的背影,整個人像投入江河大海:究竟跟一個左膠做親屬難,還是和左膠一同爭取真普選難?我望不透……

文:19才籽@9olitics糾糾政

【 請支持「9olitics糾糾政」FB專頁 】

發表意見