立場新聞 Stand News

以窮困的名義

2018/9/1 — 18:50

深水埗區夜景(資料圖片,來源:政府新聞處)

深水埗區夜景(資料圖片,來源:政府新聞處)

同大家分享講一個故事。林鄭曾經接受記者專訪,出咗個頭版話佢講咗「公屋封頂論」,公眾先發現,原來佢心裡嘅房屋政策就係出賣基層,逼大家上樓。之後林鄭反過嚟話個報道斷章取義,佢唔係咁講,係人哋冇理解清楚佢嘅意思,然後想全世界倒番轉頭幫佢解話。

故事嘅發展,就係佢再冇提過公屋會封頂,但公屋全面私有化嘅議程,就暗瓦底一路咁推行緊。

呢個故事教訓我哋,出賣基層嘅人通常係會話自己係幫緊基層,但有時會出現 Freudian Slip of Tongue,唔小心露底。有時仲會話係啲記者同全世界誤解咗佢嘅意思,不過兜都兜唔番。

廣告

成個土地大辯論的過程中,共識就預咗搵唔到,但就搵到好多聲稱自己係想幫啲劏房基層嘅人,當中唔少都係土供組成員。佢哋會刻意將依家基層所面對嘅居住問題,收窄成淨係講「過往冇填海造地」,誤導基層覺得保育同發展係對立,唔針對地產霸權、資訊封閉、土地壟斷嘅問題。

以窮困的名義,有啲人講過取消廉租屋逼大家買樓就可以幫基層「脫貧」,有啲人就話你要倒 7,000 億落海(即係 700 萬市民每人夾 10 萬)填個人工島先有得「住好啲」,有啲人考察劏房嗰陣對著劏房戶大聲講「嘩,間劏房重細過我住間房」以為好悲天憫人,有啲人乖乖哋收政府同地產商錢幫佢救濟下啲基層,以後就唔再聽佢講過地產霸權問題。

廣告

風水佬呃你十年八年,最後因為冇處理以上真正問題,造咗啲地最尾就繼續益咗地產霸權同既得利益,借幫基層之名,完全配合政府搵代罪羔羊嘅議程。其實公眾都知道呢班人,係真係心繫基層定另有盤算。

你鐘意走去大灣區發達、收錢賺啲地產商錢講嘢冇人阻止到你,但我最不齒就係有人借幫基層居住嚟呃飯食,不斷誤導基層真正問題所在,當普通市民係豬,餵咩俾佢哋都照聽,最後其實暗中配合香港權貴嘅利益。呢啲人其實唔駛開名,明眼人聽其言觀其行,都可略知一二。

 

作者 Facebook

發表意見