立場新聞 Stand News

仲有咩方法可以令香港從新開始?

2019/7/28 — 18:53

其實政府都已冇咩路行。硬的話,一係就宣佈戒嚴,警察盡出,見人就拉;一係就叫解放軍出動。但兩種方法都會超級重創香港經濟同國際地位,外交後果難以預測。而且最緊要係,除非佢對香港人進行大屠殺,否則示威都唔會停(或者就算有大屠殺,都唔會停)。

一係就退,但如果退,就必需要退得徹底,五大訴求就算只做四個,都一定會有人唔收貨,大家習慣咗齊上齊落,又冇領袖冇組職冇得談判,運動都好難斷尾。如果政府/中央決定退的話,去到呢個位,警察同何君堯等已經係 lost cause,必定要拎嚟祭旗;亦都唯有咁,香港先可以 restart。

但當然啦,如果真係咁退法,中央會覺得自己好冇面,同埋全世界都會問呢啲嘢點解唔喺一個月前做,要等到今時今日先做。不過冇㗎喇,bygones are bygones,現時除咗咁,仲有咩方法可以令香港從新開始呢?我真係諗唔到。

廣告

中央當然會諗不如繼續分化示威者、或好似傘運咁用時間拖垮運動等,但今時不同往日,同一招對聖鬥士係冇用嘅,今時今日香港絕大部份人都對政府極度失望同痛恨,史無前例地團結、民意史無前例地一致;反而成個建制陣營已陷入紛紛割席、不斷內爆嘅階段,再拖落去,會係建制自己拖垮自己先。再拖,更加冇得返轉頭。

揮慧劍,斬淫根,係對政府及中央最好而且唯一嘅可行做法。

廣告

 

(標題為編輯所擬)

作者 Facebook

 

發表意見