假才子

假才子

比較政治碩士學歷,現為傳媒工作者。「假才子」是因為現在流行才子才女,但又沒人敢承認自己是假大空才子才女,故先行澄清。文章寫得不好還請見諒,畢竟我不是真才子。

2019/1/29 - 14:06

仲要比幾多次機會班長者高官?

林鄭月娥,圖片來源:無綫電視片段截圖

林鄭月娥,圖片來源:無綫電視片段截圖

特首林鄭見記者,話接受外界批評,同意政策可以處理得更謹慎更全面,和公眾互動更深入,會反思。然後筆者就又在網上見到五毛話比多些時間/機會佢啦。真係睇到我就嚟覺得發火都嘥 gas。佢做咗成 40 年官、60 幾歲人,仲要比幾多時間/機會佢呀?一般人退咗休㗎啦。

睇返,其實當日選特首時佢都咁講過㗎。搵返 2017 年 1 月的新聞,可以見到佢話自己「論盡」,公關技巧不足,要學習同市民溝通。諗返,我當時都已經同同事講,佢做咗就嚟 40 年官都未學習過同市民溝通㗎?結果,過咗 2 年,好明顯佢冇學習,冇反省過啦。

講開,其實我幾年前已經因為一件事對林鄭個人睇法變得好負面,源於一句「天堂留咗位比我」。佢當自己係神定教宗?一個人係要幾自大、自以為正確、自我感覺良好,先講得出依句?我以為神教人要謙卑嘅?所以我完全唔出奇佢做咗 40 年官,都仲有咁多甩轆,咁多要反思,因為佢好明顯就係個你哋意見講完,佢態度照舊的人,完全唔會有真反思。

廣告

事實係佢咁多年來都係咁樣態度。初次見面就好似和和氣氣,你講幾句佢唔啱聽就唔會聽落去。成名作皇后碼頭,係見你班示威者呀,不過一項意見都唔接受,只係重申佢已經決定咗拆,佢話 OK 就 OK。當日雨傘見學聯,開始時好似有禮貌,跟住越坐個表情就越唔耐煩。對民主派又係,上任開頭猛話大和解,依家有事起嚟就只見親中派,到你班人求佢啦先得閒見吓你,仲不忘寸你係咪妒忌。唔只對反對派係咁,周永新同黃遠輝報告都係咁。

咁多年嚟,咁多鑊嘢,態度照舊。你哋依班上唔到天堂的罪人,佢根本唔會放在眼內。

所以咩比機會佢,真係難聽過粗口。示威的年青人,又唔見你哋講比機會。

最後,班 50 後五毛廢老(* 都有唔係五毛/廢老的 50 後嘅,雖然係少數)真係好心唔好再猛吹咩食鹽多過你食米,你班後生冇經驗冇乜乜物物。你望吓充斥著 50 後的現屆政府,有邊個唔係廢柴,係拎得出嚟見得人嘅?我真係諗唔到。依班人 40 年前考第一、入大學、中 AO、有大律師會計師,仲有做埋大學教授的,算係 50 後的 crème de la crème,精英中的精英,都係個個無能兼醜聞纏身。大學生浪費緊納稅人金錢?夠依個政府班人浪費?

 

作者網誌