立場新聞 Stand News

仿作梁振英「你支唔支持香港隊?」

2015/11/20 — 11:02

作者按:我發現,梁振英回應是否支持港隊的四百字,其實係非常有用嘅萬能key,可以應用在生活大大小小不同場合...

簡單答:「我去咗馬尼拉呀。」
仔細答:
「其實冇咩咁特別嘅。因為過去一直以嚟,都唔係第一次㗎喇,香港喺一國兩制底下呢,我哋有一個特殊嘅身份,亦都有一個特殊嘅待遇,就係我哋可以以香港,雖然我哋只不過係一個城市,我哋用香港呢個身份來到去參加國際性賽事。
過去有好多國際賽事,甚至乎去到譬如話奧林匹克嘅賽事,我哋都有香港嘅運動員打到決賽嘅時候,唔好講話外圍賽,打到決賽嘅時候,係面對國家嘅運動員,或者係國家嘅國家隊,喺呢啲問題上大家都唔會追問「你會支持邊隊」咁,其實大家都知道。
我一直以來都非常支持香港嘅體育事業發展,包括我哋用啟德咁大塊地、咁值錢嘅地、可以用來幫我哋解決房屋問題嘅地,都再喺上面加多200億,來起一個體育館,說明我哋對香港體育運動,包括對足球運動嘅支持。
過去我哋都有㗎喇,就係香港隊對國家隊,唔單止係世界盃外圍賽,仲有好多啲其他賽事,其他嘅球類嘅賽事,乒乓波呀等等呀咁。所以o依啲呢,當然我哋作為香港人,亦都同時係中國人,我哋要支持我哋嘅香港隊員,以及國家嘅體育事業。」

【應用一:你鍾唔鍾意我?】

簡單答:「我去咗馬尼拉呀。」
仔細答:
「其實冇咩咁特別嘅。因為過去一直以嚟,都唔係第一次㗎喇,我哋喺同事關係底下呢,我哋有一個特殊嘅身份,亦都有一個特殊嘅待遇,就係我哋可以一齊,雖然我哋只不過係一間公司,我哋用同事呢個身份來到去做嘢。
過去有好多場合,甚至乎去到譬如話特別嘅場合,我哋甚至去到出差公幹嘅時候,唔好講話一齊,就算孤男寡女嘅時候,係面對其他嘅同事,或者係其他公司嘅人,喺呢啲情況下大家都唔會去問「你係咪鍾意我」咁,其實大家都知道。
我一直以來都非常鍾意你...嗰條領呔,包括我上次聖誕party 送俾你隻水杯、咁靚一隻杯、可以用來幫你解決飲水嘅問題,再喺上面花多20蚊,買多一包朱古力,說明我哋你嘅感覺,包括我對嘅鍾意。
過去我哋都有㗎喇,就係你同其他同事,唔單止係呢次,仲有好多啲其他機會,其他嘅類型嘅場合,公司遊船河呀等等呀咁。所以o依啲呢,當然我哋作為同事,亦都同時係朋友,我其實係鍾意你,以及公司嘅其他嘅人。」

【應用二:你信唔信耶穌?】

簡單答:「我去咗馬尼拉呀。」
仔細答:
「其實冇咩咁特別嘅。因為過去一直以嚟,都唔係第一次㗎喇,教會喺導人向善嘅原則底下呢,我有一個特殊嘅身份,亦都有一個特殊嘅待遇,就係我可以以弟兄姊妹,雖然我只不過係新朋友,我用慕道友呢個身份來到去參加教會嘅聚會。
過去有好多大型聚會,甚至乎去到譬如話佈道會嘅場合,我見教會都有人喺呼召嘅時候,唔好講話平時聚會,去到決志嘅時候,係面對教會嘅傳道人,或者係外來嘅講員,喺呢啲問題上大家都唔會去問「你信唔信耶穌」咁,其實大家都知道。
我一直以來都非常願意信耶穌...係導人向善嘅,包括我用星期日嘅時間、咁寶貴嘅時間、可以用來送我仔女返兒童主日學,都再喺上次花咗200蚊,來支持教會嘅步行籌款,說明我哋對基督教信仰,包括對耶穌基督嘅相信。
過去我都有㗎喇,就係教會嘅聚會,唔單止係教會佈道會,仲有好多啲其他聚會,其他類似嘅聚會,福音聚餐呀等等呀咁。所以o依啲呢,當然我作為弟兄姊妹,亦都同時係佛教徒,我係願意相信耶穌,以及其他嘅宗教。」

原刊於神學是粉紅色的秋 theologia autumnitas rosea est

廣告
廣告

發表意見