立場新聞 Stand News

低能局長靠嚇 要老師出手鎮壓 要學生變鵪鶉

2016/9/3 — 13:24

教育局局長吳克儉開學日探訪小學(資料圖片)

教育局局長吳克儉開學日探訪小學(資料圖片)

之前就無中生有,暗示話有啲老師將港獨議題帶入學校,又話縱容,又說鼓吹,其實暑假當中都未開學,擺明老屈。

跟住就玩模糊,話老師有能力判斷如何處理有關討論,唔使出指引。跟住又話港獨問題在學校冇討論空間。即係想點?

依家就更離譜,「學生踩界,老師要負責」?學生講粗口,老師使唔使公開認錯,自刮自己咀巴?抑或要自我了斷,引咎辭職?還是要校長出手,老師打壓學生未盡全力要炒魷?這位局長低能了四年,有冇負責過?有誰負責過?

廣告

老師參與同學生討論,就可能變鼓吹;唔參與,也可能變成縱容。分明就係要老師做政權打手,代政府出手鎮壓,做埋思想警察,要學生個個變鵪鶉。總之一聽到學生提「港獨」兩個字,就要困佢入黑房。

真係想呼籲全港老師採取集體杯葛行動,拒絕處理同港獨相關嘅問題。以後就撓埋雙手,粒聲唔出,有學生討論港獨都唔好理。總之就唔關你事。睇下個低能局長重可以搞出啲咩嘢花㨾。出份指引囉!清清楚楚!佢哋自己心知,根本無法執行,如果唔係,早就做咗啦。

廣告

將來的情況可能變成這樣:

「在開始討論之前,作為老師的我,根據相關指引,有責任向各位同學說明,根據基本法第一條,話香港自古以來是中國不可分割的一部份,任何港獨主張,據說都不符合基本法的相關規定。依家大家可以開始討論。……」

跟住一個小時,老師全程粒聲唔出。做咗鵪鶉嗰個,原來係個老師。學生自己大鳴大放,老師冇向鼓吹過。

一個小時後,老師鄭重宣佈:

「各位同學,今日討論時間已經夠,到此為止。在解散之前,作為老師的我,根據相關指引,有責任各位同學重伸一次,根據基本法第一條,話香港自古以來是中國不可分割的一部份,任何港獨主張,據說都不符合基本法的相關規定。各位再見」

嗱,做足晒啦,唔單止冇鼓吹,重冇縱容㖭。滿意未?

 

(原刊於作者 facebook;本文為作者在facebook分享蘋果日報連結〈吳克儉:學生踩過界 老師要負責〉時的按語)

發表意見