立場新聞 Stand News

何傳耀校方拒評警察開槍對錯 校長稱未及看新聞片 校友:而家講緊人道問題呀

2019/10/2 — 12:40

10.1 警民衝突中被警員埋身以實彈射撃的中五學生曾志健,其就讀的荃灣公立何傳耀紀念中學今早聚集數百名穿黑衣的校友及學生到場靜坐聲援。校方發出聲明回應時並未譴責警方使用過度武力,只提醒學生參與公眾活動時遠離危險。及後校長、兩名副校長與到場校友舉辦對話會,校友紛紛質問校方為何於大是大非前仍拒絕表態,不少人悲憤而泣。亦有校友表示明白學校面對政治壓力,只要求答覆一個決定如何表態的期限,惟在場幾位學校高層均未予承諾。

校長謝潤明今早在校門外向傳媒發言時表示,學校啟動了「危機處理小組」,由心理學家、老師及社工輔導情緒受困擾的學生。然而對於警方行為是否適當、會否譴責警方使用過份武力等,謝潤明指自己未有時間認真翻看新聞片段,所以暫未能評論。校友質問指「校長你連條片都未睇,會唔會對哩件事處理得太兒戲?」亦有人指出片段為時不長,提議即場播片,但校方亦拒絕。謝潤明表示在反送中運動爆發以來,很多新聞片段在網上流傳,「我真係唔知邊樣事情係真、邊樣係假,好多時睇啲片我都只係信八成。」又指看新聞後情緒受影響,故最近都盡量不看太多新聞。校友怒斥「你唔睇新聞點帶領間學校?點做校長呀?」「而家你唔睇片都知啦,你學生中咗槍、入咗醫院喇!」

副校長:暴力無法解決問題 校友:你同警方講啦!

廣告

副校長劉瑞儀回應指,需要時間再疏理事件,家長之間的看法亦有分歧,故希望校友給予空間讓他們考慮下一步行動才再發聲明。劉瑞儀亦表示,昨日到醫院探望曾志健時與其父母傾談,家人的立場是盡量不想將事件高調處理;又指家人已找到法律支援,「與律師商討後佢建議我哋唔可以講任何事去影響審訊,希望校友明白我哋嘅難處。」

但在場校友指出:「學校唔係哩單案件嘅證人,作出咩表態,對個審訊同判決根本係無影響。你話想低調處理,可以點低調呢?琴日曾同學嘅事已經上咗國際頭版喇。如果學校今次都唔敢發聲,可能香港再無機會咁做架。可能你唔想將某啲說法講出嚟係有啲包袱,但曾同學何嘗唔係有包袱呢?我哋何嘗無包袱呢?我哋賭上咁多年既前途,係哩個政府教我哋,攞幾多 5 星星都係無用架。」

廣告

副校長何偉雄更一度以親子關係比喻中港關係、及政權與示威者的的關係,稱「父母就算做錯嘢,係咪喺屋企裡面任意打爛晒啲嘢,佢哋就會知道問題所在?」在場校友聞言極度激動:「佢射嗰個係一個人嚟架!而家唔係講政治,係人道問題呀。」「咁近距離開槍啱唔啱,係問緊你 yes or no 啫?」「你係咪唔知已經和平遊行咗幾多次?」何偉雄仍重申「暴力對解決問題無幫助。」校友指:「你同警方講啦!」何又稱:「佢(曾志健)受咗傷,係咪表示佢做嘅嘢係正確?」校友追問:「咁開槍係咪正確先?」何沒有回答。

校方:不會處分曾同學 康復及審訊期間保留學藉

亦有校友指出,期望校方就警暴問題表態,因為學校是做教育的機構,需要對是非黑白有立場。「係你哋教我哋做人要有良知架!」「公權力不受制衡,點解一句遣責、一句呼籲,話警察係濫用暴力,都講唔到?」有校友退而求其次,問在場校方高層「會唔會呼籲警方以後執法時對年輕人同學生手下留情?」亦有人表示,「你哋就算覺得暴力唔啱,學生同警察都唔應該用,咁你咪話兩邊都唔啱囉!你作為校長,唔可以再避架喇。你都避嘅話呢,香港無人敢再出聲架喇。」

惟幾位校方高層最終仍未有就警方行為是否合理作出任何評論,副校長劉瑞儀以個人立場對學生受傷表示難過心痛,指自己教學生涯無預計過要處理中槍這樣的事件。對於校友要求校方給出一個回應的期限,校長及副校長均未有承諾。只對於建制派要求開除「暴徒」,表示「校方一定唔會處分曾同學」,並會在其康復或因司法程序而影響學習的期間,為他一直保留學位。

校友:不譴責暴力會令下個學生被射殺 以何傳耀為恥

由於校方在對話會持續大半小時後仍拒絕表態,校友情緒越發激動,「我哋曾經以何傳耀為榮,而家係以哩間學校為恥。我哋唔好喺度嘥時間喇,不如走啦。」在場校友又舉手表態支持曾同學、譴責警暴,高呼「師弟妹你哋唔孤單」。

校友在對話會結束前又向校長再次強調,「譴責暴力咁基本嘅野都唔做,只會有下個同再下一個學生被射殺,我對你好失望。」有作「勇武」打扮的舊生於會後仍與校長持續對話,「我希望你哋真係會 set 個回應嘅 deadline 出嚟囉,我唔夠膽話 chur 你啲咩嘢呀。你專業架嘛,我識乜嘢教育即?但係,一個禮拜就一個人(出事)架喇。我真係需要個時間呀。」

發表意見