立場新聞 Stand News

作為第一個申請罷工基金嘅人,以下幾點想講…

2019/9/26 — 15:26

立場新聞圖片

立場新聞圖片

【文:一個零售業 sales】

我係一個零售業 sales
因為呢場 water revolution
辭咗長工、轉咗炒散
想唔到有幸成為九月頭
第一個申請勞工組罷工基金嘅人
以下幾點想講

(1) 無大台ㅤ但需要遍地水塘

廣告

聽講外國嘅工會會費係每月收入嘅一個比例,儲儲埋埋就係一個可以隨時發動罷工嘅根基,唔需要另外搵大台去募捐。

勞工組圍內嘅供款式罷工基金,正好配合無大台形勢,更靈活,而且互信互助組成,唔駛靠公眾去捐,亦減少捐去邊、邊個先值得捐嘅爭拗內耗。

廣告

啲人鬧示威者「曱甴」係因為殺之不盡,喺唔同角落不停彈出嚟,而我哋 be water 得嚟,都要有水塘、有湖泊、有海,先可以補給同維持行動力。

(2) 唔只諗人哋ㅤ都要諗自己、我哋

運動中好多人捐錢、捐物資、捐食物、捐地方,但亦有好多人唔想收其他人嘅捐助。

呢個基金唔係做慈善,亦唔係贖罪,係一個需要供款嘅基金,如果之前無捐,就申請後開始加入,一大班人嘅收入、捐款額、參與程度、財務需要都不一,組成一個小水塘互補,都算係一種民間資源再分配。

因為係勞工組成員一齊傾出嚟,我哋亦會諗申請條件係咩、有無領取期限、好無做埋因政見被炒嘅失業支援?唔只係大運動有啲乜嘢要去幫手,仲有我哋每個參與者其實有咩需要、有咩諗法、可以點樣加強「我哋」嘅力量,係一種參與式民主嘅實踐,其實每一個細胞得以鞏固,個大運動就可以更堅壯。

(3) 黃絲自主經濟圈是刻不容緩

點解咁多人唔敢罷工,唔敢罷咁多日,因為法例係無乜保障,自己喺公司得到嘅支援亦唔多,大家睇到國泰炒人手起刀落,視工會如無物。仲未計其他小店小公司,無聲無息唔知炒咗幾多人。有啲做炒散嘅,老細甚至唔駛炒你,話呢期無工開、唔搵你返工都得。

眼見唔少藍店仲有好多人幫襯,有啲藍店嘅大老闆係有份支持警察,佢哋係暴政嘅幫兇,而巿面上越多藍店,就越多黃絲打工仔隨時被打壓。單係因為呢一點,真係希望大家 set 個黃絲消費比例嘅目標比自己,就算唔能夠做到 100% 幫襯黃絲,都做個一定嘅比例,逐漸遞升。

其實罷工最緊要係癱瘓生產,而家嘅罷工係多咗好多人參與,但個威力、癱瘓程度始終有好大改善空間,罷工基金係一個後盾,提醒我哋成員唔係手空空咁罷,會有人頂住、支援!

最後提一提,雖然叫罷工基金,但呢個基金其中一個項目係因政見被炒嘅失業支援。記得勞工組其中一個口號係「工人唔係話炒就炒」,估唔到除咗追討行動之外,講講吓,就有埋一個實質嘅互助支援建立埋了!

手足加油 ?

 

延伸閱讀:勞工組罷工基金簡介

#罷工 #罷工基金 #無大台 #遍地水塘 #供款制 #打工仔互信互助 #工人唔係話炒就炒 #政見被炒失業支援

(標題為編輯改擬,原題為〈勞工組罷工基金申請分享〉)

勞工組 Facebook

發表意見