立場新聞 Stand News

你上台撐警,但警察處決式射傷你

2019/10/21 — 14:06

10 月 20 日下午,曾上台表態支持警方的印度協會前主席 Mohan Chugani 於尖沙咀清真寺外被警察水炮車的藍色水炮射中,事後接受訪問時稱不再信任警方,「Just let me down.」(《大紀元》影片截圖,來源: https://bit.ly/2pEGU90 )

10 月 20 日下午,曾上台表態支持警方的印度協會前主席 Mohan Chugani 於尖沙咀清真寺外被警察水炮車的藍色水炮射中,事後接受訪問時稱不再信任警方,「Just let me down.」(《大紀元》影片截圖,來源: https://bit.ly/2pEGU90

10 月 20 日九龍大遊行,警察水炮車竟然喺清真寺門外對準在場十幾個記者、穆斯林、少數族裔加上立法會議員譚文豪發射顏色水炮,弄傷多人之餘,還褻瀆了清真寺。警察聲竟然仲話係「誤中」清真寺

呢件事搞到上國際新聞,葉劉淑儀對孭鑊嘅林鄭同佢嘅警隊(或者調轉,係警隊同佢地指揮嘅林鄭)發炮

圖中葉劉講嘅呢位朋友 Mohan Chugani 係印度協會前主席,之前西環吹大雞嘅 7.20 撐警集會佢有份上台講嘢。大家應該仲記得 7.20 撐警集會石鏡泉發言呼籲用水喉通「教仔」,第二日就發生 7.21 元朗恐襲。

廣告

作者製圖(圖片素材來源:葉劉淑儀 Facebook、《蘋果日報》製圖)

作者製圖(圖片素材來源:葉劉淑儀 Facebook、《蘋果日報》製圖)

廣告

今次佢俾佢撐過嘅警察處決式射到要入院,都可以話係戲劇性過杜其峰作品《大隻佬》,即係講「萬般帶不走,唯有業隨身」嗰套。

今次佢俾警察射傷,佢嘅忿怒、佢對警察嘅批評可以更有力說明警察有幾橫行霸道。佢係最新而且有代表性嘅警暴受害者,最適合用來向社會大眾說明而家警隊失控到什麼地步。所以,我地唔需要對佢幸災樂禍。

不過,我都係想問:點解皇軍會處決式射傷呢位撐警印度人嘅重量級人物兼用污水褻瀆清真寺?

我比較傾向相信係因為控制水炮車嘅上進仔唔讀書,完全冇宗教同族裔敏感度,佢地眼中南亞裔就係唔駛尊重,亦唔知道清真寺有幾敏感,起勢就射,咁就出事。

咁你可能會問,乜唔係有白衫指揮嘅咩(其實我都想知架咁重要嘅水炮車上面係邊個 in-charge)?白衫點會唔知?我只能相信今時今日,員佐級散仔受西環直接指揮,可以公開批評高十幾級嘅政務司司長、可以公開批評法官、可以公開指示林鄭點做嘢,可見佢地已經唔受文官系統同白衫控制。

呢個時勢有三萬個唔讀書、冇人制衡到、作威作福到上哂癮、情緒成日失控,但就擁有致命武力嘅人通街亂嚟。隨時出街都會俾皇軍打同濫捕,你話香港社會仲點能夠安居樂業?

 

作者 Medium

發表意見