立場新聞 Stand News

你仲有耐性行幾多次

2019/7/21 — 20:47

今日遊行,係撞到最多朋友嘅一次,其中一個係記者舊同事,佢乘機扑我咪:「呢種和理非遊行,若果每星期行,你會有耐性行幾多次行到幾時?」

本來想答佢一萬年,但見佢問得認真,我都認真答:「連續行一年我自己冇難度。」

南韓民眾 2017 年推翻朴槿惠,喺佢倒台前,每個周末連續集會,足足 23 周。

廣告

運動發展至今,係比拼緊鬥志。就算係和理非,都要和理非到你服,和理非都全世界都認同香港人嘅鬥志。

嗰啲喺「守護香港」集會落雨濕曬見到紋身透出嚟嘅朋友,嗰啲喺台上講到肉緊揼地好鍾情大灣區魚生嘅名人,嗰啲唔知點解咁關心香港專登坐直通車過嚟嘅珠三角人,有冇興趣大家繼續個個星期和理非,睇吓邊個信念夠強。

廣告

信念嘅體現,唔係攞個咪就咁大叫幾聲,而係要堅毅不屈持續咁去爭取。

記者朋友再問:「和理非遊行仲有用嗎?」

呢個問題我認真諗過:「仲有用,對中間未瞓醒嘅人有用。當我地持續人數夠多咁去做,會連最政治冷感嘅人,都避免唔到要關心吓發生乜嘢事。」

好多人其實唔熱衷政治,怕麻煩,永遠捨難取易。當抗爭人數唔多,佢地會偏向想政府解決提出問題嘅人;但當抗爭人數持續高踞不下,和理非延綿一年或更長,佢地內心深處嘅慣性現實主義,就會開始思索倒不如直接解決問題,因為要解決提出問題嘅人,其實仲麻煩。

各位努力爬山嘅兄弟,今晚唔係 Endgame,Marvel MCU 啱啱先公佈咗 Phase 4,要贏呢場仗,仲有好多集抗爭嘅 Episode 要上演。

極權,永遠唔會輕易將權力拱手相讓。爭取民主,需要鬥耐性鬥韌力。

無論如何,大家今晚小心,唔好白白犧牲。

留力!打持久戰,我地好需要每一位。

P.S. 感謝平日「恕不外借」嘅洗手間,變成「全日開放」。持續嘅抗爭,就係要令平日「恕不思考」嘅腦袋,變成「全面開放」。

 

作者 Facebook

發表意見