立場新聞 Stand News

「你哋一係就攞咗盤桔封個利是,一係就預備俾人斬幾刀」

2016/8/9 — 14:21

資料圖片:劉兆佳,圖片來源:樹仁大學新聞網

資料圖片:劉兆佳,圖片來源:樹仁大學新聞網

再為劉教授題:

社會分析「我以為」,「某種程度」乜乜乜。
如此質地當顧問,自求多福靠港人。
媚權堪比宋之問,問卜未及宋韶光。
奸偽𣎴遜陳公博,劉此教授為誰忙?

今早這一位全國港澳研究會的副會長又有機會在電台上大放厥詞,主持人葉冠霖前後用了5分鐘,以不同的方式問他政府為何要由公務員執行把參選人篩選這種政治工作,他一時又說以前也有這個權力,只不過冇用盡;一時又說有中央背後的支持;總之就答不出個所以然。

廣告

有啲嘢佢完全搞錯晒,例如,「認為中央違反一國兩制」的只是「一少撮年輕人」?完全冇分析都唔在講,連基本事實都唔尊重。唔去講原先承諾了的一國兩制在回歸後不斷受中共中央的權力侵蝕,唔去面對中共前後兩次推翻對香港人嘅直選承諾,卻不斷說如果出香港人點點點,就可能保唔住一國兩制。倒果為因,莫過於此;邏輯混亂,直頭係侮辱香港人嘅智慧。

廣告

之前張德江訪港也說本土主義是正常的事。但這位教授、副會長、政協委員、前首席顧問又把「城邦論」、「港獨」、「本土主義」混為一談。相信佢已經有10多20年未有讀過書,就算所謂看過了也吸收唔到,睇唔明。怪不得早前有朋友講,若非佢一早上咗岸,以咁嘅水平今日就可能連一個AP都輪唔到佢。

成個鐘頭講得最多嘅就係:「我以為…」,「我認為…」,「區種程度…」,「如果…就會…」。這些可以算是社會分析或政治分析嗎?叫做「靠估」就差唔多,或者叫「問卜」都得,佢就好似一隻背脊敲得响嘅烏龜。

佢根本唔似係一個代表到香港人向中央進言嘅顧問,直頭係中共在香港直接委任嘅雙花紅棍,主要職責就係要不斷威嚇香港人:你哋一係就攞咗盤桔封個利是,一係就預備俾人斬幾刀。中共淨係搵啲咁嘅人嚟代表香港,聽埋D咁樣水平嘅意見,對港政策有乜辦法唔係錯足20年!又或者中共一早已經預咗佢咁,只不過搵呢啲所謂教授、偽知識分子嚟做二打六。反正有佢這樣的人願意扮演這一種醜陋的角色。

 

(編按:本文為作者在facebook分享報道〈劉兆佳:年青人因中國隊輸有快感 長此下去不利一國兩制〉時的按語;原刊於作者 facebook;標題為編輯所擬)

發表意見