立場新聞 Stand News

你唔夠無恥,就換個更無恥嘅做

2019/10/29 — 16:44

圖片來源:NOW新聞直播截圖

圖片來源:NOW新聞直播截圖

結果一如所料,港共就係幾核突都唔俾黃之鋒參選

政府本來要南區選舉主任馬周佩芬夾硬禁止黃之鋒參選,呢個馬太唔夠無恥,死都唔肯就範。於是政府要佢放病假,換人做南區專員,就連中西區灣仔區專員都可能唔制,要過海去油尖旺,搵個夠無恥、可能美國冇資產嘅蔡亮去做。

蔡亮可能準備住安全屋住一世,或者去大灣區住;政府合署也可能準備好裝修,或者要用面皮厚過蔡亮嘅鋼板保護,總之就係要完成咗個無恥任務先。

廣告

咁樣剝奪黃之鋒參選權,政府當然知道打官司好可能會輸,但佢地唔怕你司法覆核,因為一拖就一兩年,阻住黃之鋒選區議會同立法會嘅目標已經達到,兩年後都第二個行政長官了。

鍾意唔俾你選就唔俾,呢個當然係荒謬到極點,而家嘅港共,同伊朗一個 level,都係可以隨便剝奪公民參選權,都係唔批准就唔俾做候選人。

廣告

蔡亮回覆嘅云云理由之中,我覺得最正係呢個:「蔡亮引述黃之鋒 10 月 26 日第 3 次回覆選舉主任(蔡亮)的信件,指黃之鋒回覆引用習近平說法『在中國搞分裂,結果只能粉身碎骨』而表示不支持港獨,只是因為習近平『嚴詞威脅』,而非黃之鋒真心放棄主張。」(引述關鍵評論網報導

我有理由懷疑蔡亮係周永康薄熙來反習勢力嘅人,佢「非真心」擁護習近平主席,明知全世界會睇住佢點回覆,佢就專登利用黃之鋒言論暗諷習主席只係靠淫威治國,靠威脅而非習思想優越性統治國家,令習主席俾人竊笑。其心可誅也。

 

作者 Medium

發表意見