立場新聞 Stand News

你睇睇,北京千方百計不知幾咁想 DQ 我

2019/10/28 — 11:56

立場新聞圖片

立場新聞圖片

區議會選舉如箭在弦,但作為海怡西參選人,至今我仍未獲確認入閘,至今仲未獲答覆。我相信,呢個係因為選舉主任、政府同北京傾唔掂數,搵唔到任何法律理據羅織罪名去 DQ 我,先搞到不斷拖延。

今日睇報紙都證據到呢一點,《文匯報》社評擺明車馬威嚇選舉主任要 DQ 我,仲有《人民日報》無啦啦老屈話 2012 年嗰時,我獲得美國國家民主基金會的財政資助(???)。好心啦,我七年前嗰陣已經澄清過,相關指控根本無中生有,我從來都無收取過任何外國捐款,你不如翻炒當年《大公報》話美國海軍陸戰隊員教我格鬥術。

點都好啦,我自己政治立場從無改變,改變既只係政治審查的環境;而其實提到「不支持港獨為自決選項」都唔係新鮮事物,既然我一向唔主張獨立,我或香港眾志自然都唔會主動倡議獨立作為自決選項。當然,《人民日報》都會千秋萬世咁繼續稱呼我為「港獨頭目」就係後話。

廣告

而對於有傳蔡亮收恐嚇要入住安全屋,我昨日都有咁既回應:「大家見到馬周佩芬做選舉主任成個月都係安然無恙,我相信唯一一個要蔡亮入住安全屋既原因,就係防止佢因病休假,病都唔畀,假都唔畀你請,個人都喺政府手上,焗住佢一定要落決定。」

如無意外,政府係需要喺今個星期四刊憲,到底政府係乜嘢取態,想動用《緊急法》定任何權力去押後選舉都係未知之數,但我只衷心希望 #選舉主任蔡亮 能秉持公務員政治中立原則,依據我既回覆作清晰決定。

廣告

作者 Facebook

發表意見