立場新聞 Stand News

佢哋都賴雷動? 真係好好笑!

2016/9/6 — 16:03

熱血時報網站直播頻道截圖

熱血時報網站直播頻道截圖

熱普城又將慘敗賴落雷動,真係好好笑。雷動計劃嘅問題另文再述,但熱普城落敗真係關雷動咩事?

1. 大家應該唔會唔知,雷動計劃係戴耀庭搞出來,即熱普城口中的「戴妖」,一個由佔中開始被人鬧到今日嘅教授。

2. 而雷動計劃,係將熱普城歸入非建制。我初時都有懷疑雷動包唔包熱普城,但原來係包嘅。戴耀庭真有容人之量,沒有將天天鬧佢戴妖嘅陣營排除於外,冇將雷動計劃變成私人報復平台,作為「清算」的工具。

廣告

3. 因此,會加入雷動計劃的,正是熱普城清算名單(自己睇我舊POST)中排第11和第24的黃絲豬。雷動計劃連黃絲豬都會質疑,即使話有幾萬人,但參加人數也不算多,至於稱戴耀庭為戴妖嘅熱普城忠實支持者,相信唔會加入。

4. 咁雷動計劃有冇叫人投熱普城?有,新西,如圖,佢叫支持鄭松泰嘅繼續投畀鄭松泰。咁點解叫人投游蕙禎都唔投毓民?因為雷動聲吶內九西的策略選民不足三分一願意投給黃毓民。同樣,在九東,雷動聲吶內78%的選民不願意投給黃洋達。

廣告

5. 參與雷動計劃的人,就是為大局(希望攞最多非建制議席)而來的,既是為大局,即不是某些人的死忠,而可靈活調配手中的一票。這也解釋了,如果一個人是黃毓民的死忠,會參與雷動去協調的機會相當低。

6. RECAP,由於雷動計劃由「戴妖」搞,熱普城大多不參與,參與的大多是要被清算的黃絲豬,而呢群人不是建制派機器,仍然有一定獨立意志,佢會在雷動建議名單中再作選擇。

7. 換言之,如果雷動不理參與者的共同決定,叫他們違反自己表決的意願投黃洋達和黃毓民,這一群策略選民最有可能就係違抗,令雷動計劃如同虛設。假設雷動叫人投黃洋達或譚得志,這群人想起每天在網上被熱普城清算、追殺、被辱罵、被咒死全家等等,很自然,就會把票投畀譚得志。但這是假設問題,因為雷動叫人投票前,先進行了投票意願的調查,而熱普城冇人支持,點解?原因又返番去第6點。

你話熱普城搞個「血動計劃」得唔得?結果一樣輸,因為黃絲豬根本唔會參與毫無公信力兼日日屌佢哋的熱普城計劃,結果個pool太細又冇廣泛代表性,變返自己人圍爐打JJ,點協調都冇用。

所以,唔好吓吓都賴人啦。首先你本來係有權參與雷動去協調架嘛?還有,好多人都講,黃毓民輸,係由佢發炮鬧梁天琦同青政開始埋下。至於點解鄭松泰可得高票而雙黃輸?自己反省吓啦。

即使雷動確有問題,但事實擺在眼前,有冇雷動,熱普城根本就係唔夠票,有雷動,事實冇變,只不過有雷動,熱普城有得賴囉!

(文章標題為編輯所擬)

 

 

發表意見