立場新聞 Stand News

值得讚賞的白宮發言人

2016/11/15 — 7:13

最近幾個月,隨着梁振英要部署出來爭逐連任特首的機會,這位所謂白宮發言人便要不斷擔當馬前卒的角色。看來他的策略是要製造話題、要引起各方注意、要把一些指控及批評淡化、或許也想扭轉一點點對梁振英的負面看法。

梁振英作惡四年多,幾年來興風作浪、撩事鬥非,現在想要平反,本身難道已經十分之高。再加上這位馬前卒實在水平太低,結果只能鬧出笑話連場。

今時今日,如果夠膽講梁振英作為特首十分受市民歡迎,大家總不得不讚賞馮煒光嘅膽色。能夠提出咁反智反常識反公眾眼球反客觀證據嘅講法,全香港有幾多人講得出?

廣告

馮煒光另外重有一點值得讚,就是做奴才做得忠心耿耿,這是做奴才的專業操守。水平低唔緊要,最緊要夠厚面皮,唔拍核突,唔怕生按白造乞人憎,唔怕滿口歪理笑死人,唔介意丟人現眼。最緊要講嘢之後出到街達到霸佔版位及air time之效果,就算係負面宣傳都總算係曝咗光。政治人物唔怕負面新聞,最怕係冇新聞。特朗普就係咁,連美國總統嗰位都撈到。喺今日咁反智嘅年代,誰敢百分百肯定話馮煒光冇機會成為真正嘅白宮發言人?四年幾之前,有邊個諗到佢可以成為特首嘅新聞統籌專員?都話咗,「世有伯樂,才有千里馬」;今天香港,「先有梁振英,才有白宮發言人」。呢個世界有時真係可以好出人意表㗎!

就算唔信佢真係忠心耿耿,都要承認佢有職業道德。呢點也要讚。每月𢭃咗納稅人幾十萬,算係交足戲。就算達唔到目標、又解決唔到咩問題,都總算係做到一D啲戲劇效果。睇佢出嚟獻醜獻世搞笑,總好過睇李飛讚賞記者嘅法律常識好過法律專家,也舒服過見到張曉明話愛國要成為香港社會嘅核心價值。

廣告

佢有咁多值得讚賞嘅地方,大家何必理佢,咪由得佢繼續癲落去囉。咁唔客氣回應,一則抬舉左佢;其二可能正中下懷,佢就係想製造話題。其三,如果嚇親佢,佢真係收聲,日日剩番張曉明、李飛、譚惠珠⋯唔好搞到個世界咁灰好唔好!

發表意見