立場新聞 Stand News

假如杜琪峯開拍《黑社會3:雨傘革命》…

2015/7/20 — 18:57

杜琪峯日前接受英國文化藝術雜誌《The Skinny》專訪,話雨傘革命及其中的道德情操,會印於自己腦海、記憶當中,仲話自己其實好希望為呢場運動拍齣電影 — 就好似佢都好想拍《黑社會 3》一樣。

但因為擔心咁樣做會為電影公司帶來負面後果,所以暫時作罷,佢話。

老老實實,作為香港人,我當然支持杜 sir 啦!甚至乎,駛乜又拍《黑社會3》,又拍雨傘革命?不如撈埋一齊,做瀨尿牛丸 — 呀唔係,係《黑社會3:雨傘革命》吖笨!

廣告

黑社會和雨傘革命有乜關係?大家心知肚明。而以杜琪峯對描寫警隊同黑社會(又或兩者二合為一)的擅長,我好肯定佢會將呢個題材發揮得淋漓盡致,分分鐘可以救返奄奄一息的港產片,成為香港電影史上的又一經典。

眾所周知,杜 sir 拍戲一向有用開的演員班底,尤其是警匪片,用來用去都係那班演員。既然係咁,不如我地索性幫佢諗埋呢套《黑社會3:雨傘革命》的演員名單啦。

廣告

曾偉雄同許紹雄一個餅印;朱經緯同任達華其實有幾分相似;七警邊個做?可以搵吳鎮宇、黃智賢、林嘉華、何華超、張兆輝、李國麟,當然唔少得金像獎做司儀講嘢一舊舊的林乜乜啦。(其他演員名單,請見文末。)

你會話,喂大佬,呢套戲邊個肯拍呀?又唔上得大陸。就好似杜 sir 在專訪裡面講,大陸投資者動輒可以比一億你拍齣戲,但香港?一千萬都偷笑。呢套驚天地泣鬼神的大製作,邊度搵錢拍?

潮流興 crowdfunding。香港人的電影,梗係香港人自己出錢。只要杜 sir 一聲令下,一於將個 project 放上 kickstarter,十萬香港人,每人三舊水,就有三千萬喇。回禮項目?求其送張戲飛,派隻 DVD,又或者畀我地係現場跟拍攝(但可能會造成另一次佔領),都得啦!

其實,就算無回禮,我諗,香港人都係一啲都無所謂的。

《黑社會 3:雨傘革命》,幾時開拍?我,哋,一,定,留,名,等,睇!

* * *

如果,杜 SIR 真係拍《黑社會3:雨傘革命》之幻想演員表:
 

一、警方

 

二、政府官員

 

三、其他

 

四、特別演出

如此陣容,香港人你睇唔睇?

發表意見