立場新聞 Stand News

假讓步ㅤ真硬闖

2019/5/30 — 22:14

李家超

李家超

李家超公佈所謂嘅讓步,包括將移交罪行刑期門檻由 3 年變 7 年、啟動程序時候加入更多限制、加強保障疑犯利益,再喺政策聲明表明移交逃犯請求必須由能夠代表中央嘅機關提出。

政府睇落好似聽民意,但嗰啲真係叫讓步?

就算門檻好似高咗,「送中」嘅本質同內涵冇變過。唔通換咗種罪行,你就會相信中國嗰套「陽光司法」?唔通提高到 7 年門檻,中國就唔會換個罪行告你、引渡你?

廣告

更何況,今次修例唔只「送中」,係直情可以送你到世界唔同嘅極權、專制國家,亦都令香港陷於無盡嘅政治風險當中。

舉個例,泰國前首相他信成日都鍾意喺香港,修完例後,泰國政府就可以去要求特首啟動引渡程序,將涉嫌貪污嘅他信引渡返泰國。但明眼人都知道,呢個指控有政治動機喺後面,如果特首唔啟動或法院否決申請,會唔會令港泰或中泰關係變差,搞到好鍾意去泰國嘅香港人冇 E-道用呢?

廣告

同樣道理,就好似之前沙特阿拉伯有兩個女子逃亡到香港,咁係咪沙特政府又可以超低門檻去申請引渡?否決咗,係咪又會令香港承受更大政治風險?

都仲未講到,如果中東地區又因為遜尼派、什葉派嘅派系衝突,要求香港政府引渡逃亡咗嘅人返去,政府講明唔會因為宗教原因引渡,咁會唔會令香港承受埋宗教衝突帶來風險?

降低引渡門檻,到時唔單只捉蟲,更加係令香港承受更大政治風險,咁又何苦呢?

我哋今日討論嘅議題,唔應該淨睇中國,而係應該將視野放大、放遠。如果第時香港因為修例降低門檻面對更大嘅政治同保安風險,想請問,到時係咪林鄭同整個班子承擔責任?

一時修例可能好爽,但香港後患必定無窮無盡。

9 號,大家點都要出來行,香港政府、保皇派肯定唔會人數改變決定,但外圍政治形勢就肯定會睇住香港人嘅反應係咪會好強烈。要人哋幫你、救你,首先都要自己救自己先。

 

作者 Facebook

發表意見