立場新聞 Stand News

【全文】周永勤棄選發言 暗示受威嚇

2016/8/25 — 22:17

周永勤(背景圖片來源:有線新聞片段截圖)

周永勤(背景圖片來源:有線新聞片段截圖)

【編按:自由黨周永勤今日在有線電視的新界西立法會選舉論壇中,宣布棄選決定,更稱原因是不想身邊重要的人惹上麻煩。以下為其在facebook貼出的發言內容。】

周永勤開場發言內容:

各位選民,我喺4號嘅候選人周永勤。我從政22年,長時間為新界西市民服務,到底我喺一個點樣嘅從政者,大家可以喺互聯網或者 facebook,甚至街坊口中了解到,我究竟喺一個點樣嘅區議員;我現在要向大家宣布一個非常沉重嘅決定,基於我唔想身邊重要嘅人,惹上更高層次嘅麻煩或者賠上代價,過咗今晚,我會停止爭取所有選民支持嘅選舉工程,呢個論壇將會喺我出席嘅最後一個。

廣告

喺嚟緊嘅4分30秒主場質詢,我唔會向我嘅競敵提出任何提問,亦都唔會回應任何問題;到咗總結時間,我會再發言。

廣告

喺呢喥,我要向一直支我嘅義工、教友、街坊、支持者鞠躬道歉,因為我個人力量唔夠,可能辜負咗大家,對唔住。

周永勤總結發言內容:

喺8月13號,我喺中環碼頭天橋底出席咗一個民間團體搞嘅公開論壇,其中一位年輕侯選人好激動回應台下質詢,佢發誓咁講「如果我做咗尐對唔住香港人嘅事,就不得好死!」當時我見到27歲嘅自己,都一樣喺充滿熱血,要服務社會;經過咗22年嘅議員工作。今日我想講,死並唔可怕,我身為一個基督徒,我知道我死後與主同在。

其實,人最可怕嘅喺,看見自己無辦法保護到自己身邊重要嘅人;同時我亦深深感受到雞蛋同埋高牆嘅關係。人天生有追求公平公正公義嘅心,好純粹;我就因為呢種純粹,變咗做雞蛋,我唔怕做粉身碎骨嘅雞蛋,唔怕面對烏合之眾,但我唔想身邊重要嘅人,惹上更高層次嘅麻煩或者賠上代價。我充分感受到個股無助感!

廿年深耕‧新西希望,我似乎錯啦;原來大家都唔喺咁著緊有希望,「希望」喺我咃嘅社會已經變成奢侈品。

好對唔住,因為我個人力量唔夠,可能辜負咗大家。

曾鈺成講:香港一定要贏,我想講最後一句:香港人喺唔可以輸!

發表意見