立場新聞 Stand News

共產黨嘅戲軌你同我都諗到

2016/6/19 — 11:19

網頁截圖

網頁截圖

唔使問舒淇,共產黨嘅戲軌你同我都諗到。

當醜事曝光,共產黨下一步就會向對方作人格謀殺,不斷向佢潑屎水。除咗這幾位被強力部門操控安排的人質會被迫配合之外,大陸地大物博,乜人都有,要好戲連場,就會好戲連場,大家買定花生。

唔使好耐,不單佢女朋友會被迫喊住指控被利用,重會有一班不明來歷的南北佳麗出現,投訴佢包養二奶三奶四奶,可能仲要仔都同佢生埋,仲搵到一兜細路出嚟喊爹。又會有人話,佢拉亂搞男女關係,係感情騙子,重可能戀童、性虐待、重有極度變態性傾向㖭。到時唔單止有稿。你估大陸班公安唔識用Photoshop咩?濕碎啦!佢哋可能有個仲勁啲嘅App,叫做改圖秀秀,用咗幾拾年啦。乜圖都有,重有假?

廣告

重未夠?冇問題!唔駛幾耐,會有一班自認係佢幼稚園老師的二打六浦頭,出嚟指證佢幼稚園時代已經頑劣難馴,經常搗亂課堂秩序,違反人類道德良知及人格底線,三歲已經知佢冇得救;跟住又有一班自認係佢嘅小學老死,話為了正義及發揚社會主義道德,出嚟指控話佢小學雞時已經蝦蝦霸霸,又冇口齒,欠佢哋五毫子仲未還;跟住又有一班唔知邊度跳出嚟嘅中學同學話佢專門偷雞摸狗,最叻偷厄拐騙,又唔注重公共衛生,成日挖鼻屎,總之就係信唔過。最後,香港政府知情人士又會向某D傳媒吹風,話原來佢同跛豪好熟,識得林過雲,同徐步高係老友,係葉繼歡嘅徒弟,同李洪志關係曖昧。

你呢班關不識時務不知好歹嘅香港人信唔信係一件事,最重要嘅係要為五毛鼠輩提供彈藥,為建制走狗提供下台階,為共產黨消毒。

廣告

作者facebook專頁

發表意見