立場新聞 Stand News

再咁落去真係出事

2015/11/1 — 18:52

梁齊昕facebook

梁齊昕facebook

其實做得耐輔導嘅朋友,睇梁氏母女萬聖節單case,都應該會搖頭嘆息,如果只係一般家庭case,會易處理好多。

其實個女廿幾歲,萬聖節扮鬼蒲蘭桂坊唔係咩大事,梁氏夫妻都響同一晚去過海洋公園探劉鳴煒(下圖右邊嗰位)班,劉鳴煒扮鬼都扮得好出位下,梁振英仲響FB 貼相話「have fun」。萬聖節扮下鬼,如無宗教信仰規範,其實冇咩事。

如果報導冇錯,似乎係梁母到場想帶走個女,個女之前先公開話過佢曾經涉嫌家暴對待佢,而家你當住班friend 同記者面前想的佢走,佢一定同你搏命。結果就搞出尋晚咁大件事。

廣告

其實梁氏夫婦真係好需要輔導專家介入,而且需要響梁氏母女之間搵個中間人處理糾紛。下下當住全港傳媒打打鬧鬧,公眾不免會問,梁作為領導人是否需要花多啲時間處理家庭問題?

其實睇梁氏母女糾紛單case,傳媒報導、網民追捧,一定會激化雙方負面情緒,但係你冇可能叫傳媒唔報導、網民唔追捧。馮煒光都自比白宮發言人,咁「第一家庭」點會冇人追訪?(彭定康一家人都好多傳媒報導,啲網民到而家仲share 緊佢地啲相)

廣告

從梁氏母女過往嘅糾紛睇,梁女面對來自家人嘅壓力,往往利用FB 同IG 作發泄、求救,甚至反擊嘅渠道,而因為梁家地位,呢種做法又往往看似「有效」,咁結果就愈搞愈大件事,卒之就發生當眾郁手嘅場面。

而家梁家最需要嘅,真係專業輔導,呢類輔導唔係淨係輔導個女,而係梁氏夫婦同個女都要坐埋一齊接受輔導。

我當然係反對梁振英連任,甚至佢做多日都係香港之災。不過一單還一單,梁氏母女已經創下無數個禮賓府家庭嘅紀錄,而家呢單嘢真係隨時出事。當我矯情、婦人之仁,唔該梁生真係正視下問題,唔係真係分分鐘創下禮賓府冇咗頭家嘅新紀錄。

(後記:根據明報即時新聞,直至晚上7點,梁振英今日冇回應過呢件事,反而響佢個FB分享佢響禮賓府種米心得。其實咁大件事,已經變成兩岸新聞,可唔可以hold住啲閑情逸致post唔好上住?佢處理公務、私務、雜務究竟點排優先次序?其實佢係咪真係適合繼續做香港領導人?我諗好多香港人都有同樣疑問)

右邊嘅係劉鳴煒,梁振英仲貼FB話「have fun」

右邊嘅係劉鳴煒,梁振英仲貼FB話「have fun」

 

發表意見