立場新聞 Stand News

再被追問為何不願表態撐港隊 梁振英的回應是...

2015/11/18 — 18:41

梁振英,圖片來源:無綫電視片段截圖

梁振英,圖片來源:無綫電視片段截圖

在菲律賓馬尼拉出席亞太經合組織會議的特首梁振英,今日下午會見國家主席習近平後表示,沒有與習近平討論昨晚港隊逼和國家隊的世界盃足球外圍賽。

對於為何多次被追問支持香港隊還是中國隊,都沒有表態,是否有何敏感之處,梁振英仍然拒絕正面回應,帶記者「遊花園」,表示過去常出現港隊對國家隊的情況,都沒有人追問,又聲稱自己非常支持香港體育發展,例如把「啟德咁大塊地、咁值錢嘅地、可以用來幫我哋解決房屋問題嘅哋」,都拿來興建體育館。

答問全文如下:

廣告

問:有冇睇波?有冇同習主席傾返場賽事?國家隊可能出唔到線,有冇安撫習主席?

梁:(笑)冇呀,我哋剛才完全冇傾過睇波嘅事。

問:昨晚場波全港關注,香港市民希望你為港隊打氣,但問你好多次都唔答,其實有咩咁敏感,點解唔可以講句?

梁:其實冇咩咁特別嘅。因為過去一直以嚟,都唔係第一次㗎喇,香港喺一國兩制底下呢,我哋有一個特殊嘅身份,亦都有一個特殊嘅待遇,就係我哋可以以香港,雖然我哋只不過係一個城市,我哋用香港呢個身份來到去參加國際性賽事。

過去有好多國際賽事,甚至乎去到譬如話奧林匹克嘅賽事,我哋都有香港嘅運動員打到決賽嘅時候,唔好講話外圍賽,打到決賽嘅時候,係面對國家嘅運動員,或者係國家嘅國家隊,喺呢啲問題上大家都唔會追問「你會支持邊隊」咁,其實大家都知道。

我一直以來都非常支持香港嘅體育事業發展,包括我哋用啟德咁大塊地、咁值錢嘅地、可以用來幫我哋解決房屋問題嘅地,都再喺上面加多200億,來起一個體育館,說明我哋對香港體育運動,包括對足球運動嘅支持。

過去我哋都有㗎喇,就係香港隊對國家隊,唔單止係世界盃外圍賽,仲有好多啲其他賽事,其他嘅球類嘅賽事,乒乓波呀等等呀咁。所以o依啲呢,當然我哋作為香港人,亦都同時係中國人,我哋要支持我哋嘅香港隊員,以及國家嘅體育事業。

問:昨晚香港隊逼和國足,有沒有說話要同球員講?
(梁振英離開,頭也不回,沒有回應)

 

廣告

發表意見