立場新聞 Stand News

再見!區議會委任制

2015/8/13 — 11:17

區議會嘅成員大部分由選舉產生,但每屆區議會,政府總會委任幾十至百幾人不等做區議會嘅委任議員,好似今屆區議會就有68個委任議席;但嚟緊嘅區議會選舉,我地終於可以呢班亳無民意基礎嘅「代議士」講拜拜,因為立法會喺2013年已經通過取消區議會委任制,所有區議會都不再設有委任議席。


雖然政府辯稱區議會委任制可以讓不同背景、專業知識同經驗,有志投身社區服務的人士貢獻社區,但是政府似乎冇講以乜嘢標準及考慮因素去委任區議員。

翻查文件,《區議會條例》只係要求委任議員年滿廿一歲,及在接受委任前三年內通常在香港居住。除此之外,政府委任議員時根本毋須遵循特定準則或者用人標準,所以政府要以咩標準挑選一個委任議員,其實係留有好大嘅灰色地帶。

廣告

是故,政府委任區議員時,往往都不問能力政績,用人唯親,而一眾委任議員亦因為唔駛向選民負責,自然唔會放時間參與區議會工作,最明顯的例子莫過於區議會出席率。今屆委任議員在區議會的出席率平均只有五至六成,個別人士的出席率甚至低至一成,即十次會議才開會一次。而就算委任議員嘅政績幾咁不濟都好,都唔會冇咗個議席,好似上屆榮登「大懶蟲」寶座嘅葵青區議員鄧淑明,今屆依然獲政府委任做區議員。到底政府委任呢班委任議員係因為佢哋有心服務社區,抑或因為佢哋聽話,就真係無從稽考。

區議會委任制已經成為歷史,有心服務地區嘅人都必須靠實力和政績,透過選舉爭取選民支持,先有機會晉身區議會。

廣告

 

原刊於2015選戰 顛覆區議會!

發表意見