立場新聞 Stand News

凡事政治化阻住揾食

2018/10/8 — 10:13

【文:陳清泉】

「⋯不如專心攪好經濟民生。」我咁樣留言,當然俾人話只顧揾錢唔講大原則,差在冇叫皇天擊殺。

唔好以為我係俾左膠或者泛民本土自決港獨派鬧呀。我係喺全港第一建制大黨領導人個面書度留言的。講嘅係FT記者續唔到簽證單嘢。大家不妨自己試試,留呢一句啲建制派以前日日講來批評民主派嘅說話,肯定得到好招呼。

廣告

香港政府不續簽證給金融時報記者的事件,英國政府已經出聲,我估林鄭一次過上哂所有西方國際傳媒都係少有,呢次都好抵吓。維護新聞自由呢啲好多有識見嘅朋友都講咗不少。我只想講,而家中共同土共政治鬥爭上哂腦,香港雖然底子厚又有祖國射住,但日日摻和呢啲無謂嘢,遲早攪到香港揾唔到食。到時一線富豪就梗有脫身之計,公務員有鐵飯碗唔駛怕,我地呢啲所謂專業嘅偽中產就多得你地唔少。

民族黨打打咀炮,你有證據佢勾結外國推翻政權或者買軍火諗住暴力起義,咪拉鬼佢囉。冇嘅,咁人地去外國記者協會度講吓嘢,講之嘛,香港人實實際際,冇影響咪有得佢嘈囉。而家你連講嘢嗰個犯咩法都未知 – 民族黨作為社團要停止運作,阿陳生仲係可以講嘢唔犯法㗎。都未提做講座嗰陣一哥都未出命令話封殺民族黨啦。咁人地攪個講座犯咩法呢。

廣告

而家你唔正正經經話人犯咩法,因為講唔出呀嘛,但就鬼鬼祟祟咁將人地協會代主席簽證唔續,變相驅逐出境。咁樣就遲早攪到大家揾唔到食囉。

有冇咁大件事攪到揾唔到食呢?絕對有。新聞自由係香港嘅核心價值點點點已經好多人講咗啦,我份人比較粗鄙實實際際。好嘞,而家香港講得出去嘅最勁最揾錢係咩呢?就係「國際金融中心」嘛。(地產呀炒樓都揾好多,不過就唔通你叫林鄭去APEC開會講香港最勁就炒樓,請各國一齊來香港炒一轉咩,講唔出口㗎嘛)。好嘞,咁你拒簽嗰位記者係貴寶號呀?金融時報喎,Financial Times喎,倫敦最有歷史最有江湖地位嘅首席金融傳媒喎。而家國際金融中心,你話FT記者無得自出自入揾料報導呀?咁所有外國大鱷Hedge fund經理睇咩報紙好呀?「紅早」定還是環球時報呀?問心,你自己係做金融業嘅話,你會睇邊份、信邊份呀?

你話而家我唔俾嗰個記者來啫,你幫我換過個我咪簽返俾你囉,唔係唔俾你FT做呀。咁其實FT喺中國都係咁的,冇問題呀。

問題在於,你將大陸嗰一套搬來香港,香港變咗大陸一樣啦。咁即係香港變成「大陸的國際金融中心」啦。相信好多所謂愛國愛港嘅人都係想咁啦。但我想提醒大家,揾食呢,就講competitive advantage,「大陸的金融中心」一早有啦,嗰個叫上海呀。

好多贊成中港融合嘅盲毛都只係講政治,見習主席想推就起勢去推。好啦到你真係成功嘞,我想問廣大專業人士偽中產們,你地做專業嗰陣,用大陸嘅做法,你會唔會做得叻過大陸人?如果叻唔過,咁香港變咗中國之後,點解你覺得你會揾到食?

比如你做律師,唔講司法獨立、要三權合作嘅官司,你班HKU讀PCLL出來嘅香港仔識打咩?你做工程嘅,起橋起路,你夠薑用紙皮垃圾做橋墩咩 – 噢呢點我收返,觀乎沙中線咁樣,可能都得,不過就未做完就俾人捉出來,技巧未夠高。

講返我本行,如果貴公子文憑試考好多5**,入咗精算系畢業考到精算師。如果要跟大陸做法,你估佢埋完盤數仲可唔可以全身而退?內地某保險公司俾人攪咗咁耐又話違法又剩,CFO精算師全部冇事,呢啲嘢你香港人學得到咩?你香港仔剩係識跟規矩做,學大陸做法做得掂咩?

越講越遠,你話我睇唔起香港人都係咁話,大陸十幾億人,人材數量一定多過香港。香港人要保住飯碗,就要有比較優勢,而呢個優勢就係制度。而個制度喺唔喺度,運作得好唔好,唔係你班建制派圍內說了算。人地鬼佬有眼睇的。

講到咁總有人話,而家有人踩到中央紅線,咁梗係要做嘢。嗱,就咁,傳說中呢,好耐以前啲人以前採煤礦,就會帶埋隻金絲雀落去礦洞,因為隻雀好脆弱,咁萬一隻雀死咗,就即係空氣有問題,啲人就要快啲走。而家新聞自由就係西方社會攞出來嘅金絲雀。唔係你陳健康話呢單嘢同新聞自由冇關啲人就會信的。冇新聞自由,資訊唔流通,下一步就係冇獨立司法,衰吓一樣衰吓一樣,終有一日個conclusion就係個制度走咗樣,結論就係搬錢走。你話大陸咁好境鬼佬都一定要來?係嘅,但橫掂都係同大陸一樣,鬼佬們點解唔直接揾大陸呀?去上海咪得囉,點解要經過你香港俾錢你賺先?

我咁講係咪即係要俾特權鬼佬,佢地踩哂界都俾佢做?查實由「放任佢去做」到「唔俾簽證」之間,仲有好多選項。林鄭政府自以為係能吏治港,實則不少英治留下嘅成文制度同傳統都被破壞,要靈活變通嘅時候就硬哂軚。

而且鬼佬喺香港一向有特權㗎啦,你先唔好考究點解咁唔公平。鬼佬係咁衰嗰喎,你唔俾特權佢係唔搬錢來的。由鴉片戰爭嗰陣都係咁㗎啦。你可以好有骨氣咁話,中國人香港人踩中央嘅紅線就要拉,鬼佬踩就唔該你過主返歸。得嘅,但到時鬼佬搬錢走,或者直接去揾上海,你香港做返「大陸的國際金融中心」,又係嗰個問題,你鬥得過大陸人、到時仲揾到食嘛?

所以我唔明小麗老師選舉要講咩守護平凡的幸福,咁鬼離地。香港偽中產們最實際,就係要守護揾食嘅環境。揾到食,到時平凡同唔平凡嘅幸福,都可以自主追求。邊個出來講到俾我聽,點樣喺中共發傻又貿易戰又習主席獨攬大權之下,能夠保住香港嘅優勢,等大家、尤其是專業人士揾到食,發展到事業嘅,就攞到我嘅票啦。

至於嗰啲亂推中港融合、事事政治化嘅愛國賊,大家要睇清楚,佢地係政治優先過揾食的 – 呢樣唔係新嘢,中共黨員第一樣守則就係要「講政治」 – 所以佢地啲政策,硬推高鐵也好,大嶼山填海又好,最終都係政治任務,各位專業偽中產們都係要金睛火眼睇實,會唔會成個揾食嘅環境俾佢地攪死唒。

凡事政治化,阻住揾食呀。

發表意見