立場新聞 Stand News

凡係普羅市民喜歡的 梁振英政府都會趕盡殺絕

2016/2/9 — 2:43

我由殖民時代活到今日,未聽聞過農曆新年爆發如此嚴重的警民衝突(除船民營那次,但那不關香港人事)。農曆新年係華人最大的節日,避免衝突係大家嘅潛規則,但如今我們嘅政府和警隊可以爛到,在農曆年出動胡椒噴霧,為嘅,只係小販!

你唔好怪市民,呢啲全部係累積返嚟嘅。新年熟食小販夜市一向也是農曆新年的潛規則,殖民時代見你大時大節,又受市民歡迎,一向都隻眼開隻眼閉,即使九七後多年,呢個潛規則都能保持。咁多年嚟,我冇聽過呢啲熟食夜市導致集體食物中毒,甚至嚴重事故都冇。好人好姐點解唔開開心心喺屋企陪吓家人過年,要出嚟擺檔?但係今日嘅政府,惡形惡相,係要趕盡殺絕,唔單止出食環,仲出黑社會,出警察,出埋胡椒噴霧,為嘅原來只係咁多年嚟都有嘅、只擺幾日嘅熟食小販。

我明,凡係普羅市民喜歡的,梁振英政府都會趕盡殺絕。凡係普羅市民唔想要的,梁振英政府都會落實到底。今天,梁振英政府又創造歷史:新年流流向市民施放胡椒噴霧。你唔使怪出去旺角嘅人,一切,都係呢個政府一手造成,慢慢累積嘅民怨必然爆發。

廣告
廣告

發表意見