立場新聞 Stand News

到底基督教高層可以有幾黑暗?

2016/10/5 — 23:37

【文:林淳軒 香港眾志成員、祟基神學院神學文學士二年級生】

近日好多人去拎提名去挑戰基督教選委,但係又點會咁簡單鬥得過?

睇完數據,耶教高層可以有幾黑暗,真係難以想像。

廣告

首先講下點先有得做基督教選委,要過兩關抽籤,第一關就分四個pool

1) 搵20個過18歲洗左禮嘅基督徒提名 
^大家就係去搏呢個

廣告

2) 已註冊的本港慈善團體嘅教會可以提名一個會友
^有幾間教會多過一個牌

3) 基督教機構可以提名一個洗左禮嘅基督徒

4) 一個宗派可以提名一個基督徒
^應該得十幾人有資格玩

然後,每個pool抽10個人去第2輪抽籤,就算有再多人去抽,一個pool都係得10個,而第2輪,就係抽到出來呢40個人中間抽10個。

而建制派/奶共/同大陸有利益輸送嘅耶教高層,大部份會用機構/宗派/堂會。成個抽籤制度,建制派有3/4機會抽到,如果個人都抽中左親共人,咁就係十成十。

一個圍標嘅制度好黑暗?仲黑暗嘅都未講。

聖公會,香港大宗派,著名人物有鄺保羅管浩鳴,有48間註冊左慈善團體嘅教會,318個慈善團體/基督教機構,包括自修室/青少年中心/學校 等等。

咁聖公會實際可以點玩呢?

1. 先用宗派去提名鄺保羅 

2. 用旗下48間堂會提名管浩鳴 and friends

3. 用318間機構去提名其他想玩嘅建制派

4. 仲有人想玩,可以係堂會收20個提名,假設每間教會得200人(實得應該多幾倍),都有九千幾人,可以提名480人

係一個咁嘅制度下,聖公會最多可以靠自己旗下關係網送到847個人去玩抽籤。

再加上有幾個大宗派同好多教會表明唔玩(or無得玩),甚至基督教協進會講明設計呢個制度係唔想得失政府,建制派根本係穩入。

講到尾,做選委有咩好處呢?可以提拔做政協,返大陸盡情宣教(唔搭路點返去?),更加實際,係錢,丫,應該係奉獻。

所以點解基督教要參與呢個咁不義嘅小圈子制度,答案好簡單:

基督教高層根本當左基督教係利益輸送嘅籌碼。

信仰?食得㗎?

最後,講一個今年發生嘅小故事,係基督教協會嘅論壇入面,有一個上屆嘅選委俾人問當年投左邊個,呢位教內普選代表係咁答:

「下,呢個係我個人決定,唔需要同你地交代。」

親愛嘅弟兄姐妹,我地要起身反抗。就算只得一成機會,就算明知係燈蛾撲火,但唔打破呢個利益關係網,教會未來就係俾呢班人繼續當成賺錢工具。我希望講嘅信息只有一個:為左信仰,為左正義…

起來,不願做奴隸的信徒。

發表意見