立場新聞 Stand News

創新辦 — 可能係最偽善的政府部門

2019/7/26 — 11:27

作者提供

作者提供

【文:林俊文】

話說前日有個公務員朋友比左張相我睇,話係政策創新與統籌辦事處,即係 PICO,搞左個連儂牆表達訴求。真係唔睇尤自可,一睇把幾火,我今日扮工都唔做,就係寫呢篇文好好問下呢個所謂的「創新扮」。

首先,唔係你是但痴幾張 Memo 紙上去,色彩繽紛就叫連儂牆架。「創新扮」個連儂牆,全部都係執社會口水尾的口號,例如「政治問題,政治解決」、「講人話」、「兄弟爬山各自努力」,有冇你班友仔自己意見呀?寫哂今期流行政治口號就當係連儂牆? 好心唔好咁離地,走一轉地區行下睇下,普羅市民寫得仲有心機,睇完真係會感動,民意之間互相交流。

廣告

第二,創新辦明明係林鄭 endorse,點解林鄭政府衰左可以好似唔關自己事咁,個個變哂做時事評論員置身事外咁搞笑?「創新扮」呢個所謂連儂牆,對唔住,我無一絲感動,只係覺得好係偽善。

Facebook 上有朋友因為呢件事,讚「創新辦好波」,請問有幾好波呢?呢個「創新扮」一年成億開支,請問做過乜野呢?不如我地認真數下,呢個取中策組代之的創新辦,究竟有幾好波。

廣告

(一)公關廢。最有印象就係之前施政報告,整左幾條 Facebook 片,其中一個係所謂的 elevator pitch,尷尬到無人有,如果呢個質素放係任何一間私人企業,proposal 兩秒唔洗比人掟左出街啦,仲敢出來獻醜?另一個 Facebook Live 仲好笑,搵個大台前記者過濾哂網民留言,扮即問即答,揀哂本身有答案的問題來答,睇到市民一肚火。拍幾條片上 Facebook 咁就叫創新?只可以講一句:政府思維真係特別創新,創新到離哂罩。

 (二)零貢獻。同過公務員朋友了解過下,一般都好憎「創新扮人」,拎住林鄭當令箭,是但諗到野,就叫局去做,指指點點,完全係「風水佬畫一畫,泥水佬擔到頭都白」。其實政務官新去到個政策範疇,都算係外行人,只係會盡最快能力去理解成件事,「創新扮」對政策的理解更加係外行中的外行,但就會比哂意見,一班 AO 都反哂白眼。政府朋友仲話,做唔緊要,做完就當哂係自己野,離哂地,施政報告又係一如既往咁數白欖,完全唔知做乜。

呢個「創新扮」號稱「支援政府高層聚焦於香港在環球經濟中的策略性定位,統籌重大的跨局跨部門政策和計劃」,但真心一問,除左懶開放扮哂 Google Office、老細都坐大廳、有張乒乓球檯之外,有咩野真係做過,有咩成績,有咩政策真係呢個辦公室諗出來而又係 deliver 緊?

記得當年創新辦搞招募,係威係勢。2,256 份申請,80 個人面試,3 萬至 9 萬蚊人工,出來呢個質素,係入面的咁多位,請問你對唔對得住自己,對唔對得住香港?

其實我一路寫,一路思考左好耐,究竟呢個創新辦有幾創新,後來突然發覺,答案原來早已經寫在牆上,係個「片嗇」字,錯得最創新。

 「創新扮」,我真係代表納稅人多謝你。

傳送門:

廢到無人有的 Elevator pitch

史上最尷尬的 Facebook Live

發表意見