立場新聞 Stand News

劉兆佳:中央後悔2007諾港人普選

2015/2/5 — 12:49

全國港澳研究會副會長劉兆佳表示,現時中央不能答應寫明2020普選立法會,但呼籲港人要對自己、對中央有信心,「互諒互讓」。劉兆佳又透露,中央當初「高度樂觀評估」香港人心回歸的程度,現對2007年允諾普選特首感到後悔,認為民主派要認識到這是中央的重大讓步,「你又話唔要,唔覺得佢係重大讓步、要承擔重大風險,仲話攞多啲,恐怕最後一無所得」。

近日公民黨立法會議員湯家驊表示,若中央承諾2020普選立法會及2022年提委會民主化,願意「絕地退讓」勸服泛民「袋住先」。劉兆佳今日出席DBC數碼電台節目時表示,現階段承諾2020普選立法會,無異於將數年後的政治爭論提前到現時發生,令政改問題更複雜。他又寄語泛民:「就算從選票角度考慮,係咪你反對政改通過,喺選區就一定有利呢,我都唔敢包。」

青年選民比例例 不是重要政治力量

廣告

對於目前泛民動向似乎由年輕一代主導,劉兆佳強調,青年人在選民及人口中的比例不多,對政治格局影響不致太大,雖會有所動作,但作為一股政治力量「唔係咁重要」。

劉兆佳又透露,自己認識一些內地人士,他們均對中央2007年承諾給予香港2017年普選,感到後悔,認為當年對中港關係及香港人心回歸情況的研判「高度樂觀」:被主持問到中港政府至今均無讓步、如何說服港人,劉兆佳認為2007年承諾普選已是「最大嘅讓步」,如果中央在今時今日下決定,應不會承諾讓港人普選。

廣告

最大嘅讓步,就係2007年承諾有普選……假設係而家呢個時刻,中央政府會唔會又同意推動特首普選?我估佢唔會。

坦白講,我認識一啲內地人士,佢哋對於2007年作出呢個承諾有啲後悔添喎:點解嗰陣時咁樂觀呢?咁勇敢呢?願意承擔咁大風險呢?因為佢對國際形勢、對香港內地關係、對中央特區關係、對香港人心回歸,有高度樂觀估計嘛。特別2003年之後,中央支持香港各方面發展,令香港人對中央信任提高,甚至對中央政府信任,仲高過對特區政府信任;喺嗰個情況吓推斷10年之後,形勢應該更好,到時香港人自不然會選一啲能夠同中央合作嗰啲人,到時到候,中港關係會良好,民主又有進步。

但係幾年前開始出現嘅情況,令佢要重新思考國際形勢同香港情況,以至中央同特首關係唔可以收得返,咁你又話唔要。你唔覺得佢係重大讓步,唔覺得佢要承擔重大風險嘅,仲話攞多啲嘅時候,恐怕最後一無所得。

發表意見